COVID-19

«Шотыш налаш да умылаш йодам»

Республикыштына у коронавирус инфекцийым кондымым да шаркалымым шижтарыме шотышто оперативный штабын 8 ноябрьыште эртыше заседанийыштыже Марий Элым вуйлатыше Александр Евстифеев COVID-19 дене кучедалме мере-влакым пеҥгыдемдыме нерген увертарен.
Тыге, тиде кече гыч республикыштына пашам ыштыдыме, COVID-19 деч вакцинироватлалтдыме але пытартыш куд тылзыште палемдыме черым чытен лекдыме 60 ияш да тылеч кугурак еҥ-влаклан, тыгак хронический чер дене орланыше, пашам ыштыдыме граждан-шамычлан посна улмо режимым пуртымо.
Тылеч посна кинотеатр да театр гай тӱвыра тӧнежлаште калыкым мыняр улшо вер гыч ончычсо семын 70 процент ужашышкыже огыл, а пелышкыже гына шындаш лиеш.
«Марий Элыште илыше калык ден озанлыкым кучышо субъект вуйлатыше-шамычлан пеҥгыдемдыме чыла чаракым шукташ кӱлмӧ нерген ойлем. QR-кодым указыште палемдыме объектлаште веле огыл, Роспотребнадзор вуйлатышын темлымыж почеш общепитлаштат, услуго сферыштат, банклаштат, почто пӧлкалаштат, унагудылаштат, моло вереат лийме семын йодаш тӱҥалман. Указ кум арня гыч вийжым йомдара, да сай результат лиеш гын, чараклыме радамым иземдена. Республикыштына у коронавирус инфекций дене кылдалтше сӱретым огына саемде гын, чаракым шушаш ий 5 февраль марте шуена. Тидым шотыш налаш да экономикылан, пашам ыштыше кажне айдемылан, тудын ешыжлан могай зияным ыштен кертмынам умылаш йодам», – манын А.Евстифеев.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий