3-10 январьыште марий калык Шорыкйолым палемда. Тиде пайремым тӱрлӧ кундемыште тӱрлӧ семын эртарат. Ик ойыртемжылан, мутат уке, васликува да васликугыза лийын, икте-весе деке унала коштмым, суртоза ден озаватылан тауштен, поро сугыньым ойлен кодымым шотлыман.
Йолташ-влак, тендан кундемыште Шорыкйол пайрем кузе эрта? Васликугыза, Васликува лийын коштыт мо? Тиде пайремлан могай кочкышым лӱмынак ямдыледа?
Надежда КОРАБЛЁВА, амалкалче:
– Самырык годым илыште кажне ийын васликува лийын коштынна, пайрем пеш веселан эртен. Йошкар-Олаш илаш куснымекат тиде йӱлам шуена, йолташ-влак дене тӱрлӧ вургемым чиена да палымына-влак деке автомашина дене кудалына. Ты пайремын шӱлышыжӧ чылаланна келша. Адакшым теният теве унала вучат, толыда мо манын ончылгоч йодыт.
Шорыкйоллан ялыште лийме годым тӱрлӧ кочкышым коҥгаште ямдылаш тыршена: шӱрым, шылан пареҥгым, когыльым…
Вера Каменщикова, Кужэҥер район Йывансола ял гыч:
– Жапше годым меат, йоча-шамычат васликува, васликугыза лийын коштынна. Кочкыш шот гыч тунам пӱкшым ыштеныт, йошкарушмен дене мелнам кӱэштыныт.
Тиде йӱла кундемыштына аралалт кодын, пайрем пеш веселан эрта. Тӱрлӧ вургымым чийыше йоча-влак сурт еда коштыт, икте-весыштым лумышто пӧрдалтарат. Суртыш пурымеке, кӱварыш пырчым кышкен кодат, куштат, сугыньым пуэн кодат.
Вера ГОРДЕЕВА, поэт:
– Параньга районышто васликува, васликугыза лийын коштмым изи годсек ужынам. Самырык жапыште шкеат йолташ-влак дене чумырген, сурт еда коштынна. Ермучаш ялыште чапле пӧрт-влакым чоҥат, сандене пайрем амал дене ончен кошташ моткоч оҥай лийын. Шукынжо мемнам куанен вашлийыныт, южыжо гармонь почешат тавалтен.
Кызыт Йошкар-Олаште илена, садлан ынде Шорыкйоллан лӱмын ыштыме пӱкшым тамлаш ок логал.
Регина ЕРМАКОВА, Йошкар-Оласе 5-ше №-ан «Хрусталик» йочасадын воспитательже:
– Марий Турек район Арбор кундемыште васликугыза ден васликувам чыга- чыга маныт. Нуно тӱрлӧ семын чият, чурийым петырат, а вара пӧрт еда коштыт. Кажне суртышто тамлын сийлат. Чыга-чыга-влак пайрем ден саламлат, сай деч сай сугыньым пуат, вес ийын пиалан илыза манын, кӱвареш шурным кышкен кодат. Тидлан нигӧ ок сыре, чылан пайремын йӱлажым палат, жаплат. Школышто, университетыште тунемме годым меат тыге коштынна, жап пеш веселан эртен. Ялыште коштын савырнымек, клубыш погыненна. Тушто муренна, куштенна, тӱрлӧ модыш дене модынна. Клуб пашаеҥ-влак кажнылан шарнымашан пӧлекым кучыктеныт. Тиде йӱлам кундемыштына кызытат шуктат, пайремыш изижге-кугужге ушнат.
Шорыкйоллан мемнан дене чыпчагийым (пӱкшым) ямдылат.
Надежда НИКОЛАЕВА, Марий тӱвыра рӱдерын методистше:
– Волжский район Пӱнчысола ялыштем илышыжат шагал, садлан васликува ден васликугыза-влакым ужмашат уке. Школышто тунемме годым урем мучко пеш коштыныт. Ме вес ялыш школыш коштынна, урок пытымылан ял вуйышко лектыт да йоча ден кугыеҥ-влакымат лумыш урат ыле
Васликува семын ялыште коштын омыл, но пашаште лияш логалын. Кочкыш шотышто, авам Курыкмарий районышто шочын-кушкын, садлан 7 январьыште кажне ийын кравецым ышта, тыгак подкогыльымат ямдылена.
Алевтина БАЙКОВА ямдылен
М.Скобелевын фотожо
