Тений кеҥеж шокшыж дене куандара да тургыжландара. Шокшо деч кажныже шке семын аралалтеш: иктышт эре гаяк йӱштӧ вӱдым йӱыт, эҥерыш, ерыш чӱчкыдынак йӱштылаш коштыт, весышт утларакше мӧҥгыштӧ шинчаш тыршат.
Йолташ-влак, шокшо игечыште тыланда мом ышташ келша да мом ышташ тореш улыда? Утларакше мом кочкаш кумылан улыда? Шокшо деч кузе аралалтыда?
Никита КОЗЛОВ, самырык гармоньчо:
– Кеҥежым пакчаште паша пеш шуко, садлан кас еда тушто тыршена. Шокшо игече годым вӱдым шукырак йӱам. Яра жап лийме семын Изи Какшан эҥерыште йӱштылаш келша.
Эльвира ЛИСИЦЫНА, Марий Элын калык артистше:
– Кеҥежым ялыште моткоч сай. Кызыт шудым телылан ямдылыме жап, садлан кече йымалне лийын нойымеке, коремыш куржын волен, ведра вӱдым ӱмбаке опталын чывылалтына. Шокшо годым йӱштӧ вӱдым огыл, левым йӱына. Кече вуйым ынже пере манын, шляпам чияш, шовычым пидаш тыршем.
Чынжымак, тений кеҥеж шокшыжым огеш чамане. Кече пелтыме годым ола урем дене кошташ йӧсӧ, а теве театр кӧргыштӧ пеш ласка.
Кочкыш да йӱыш шот гыч ойлаш гын, юалгырак пура, «йӱштӧ» борщ, окрошко, тӱрлӧ пакчасаска гыч салат келшат.
Эльвира ЕГОРОВА, Э.Сапаев лӱмеш опер да бале театрын оркестрыштыже скрипкам шоктышо:
– Шокшо кечым пеш йӧратена. Чӱчкыдынак ерыш йӱштылаш коштына.Утларакше емыжым кочкаш келша, вет лач тиде пагытыште пеш шуко тӱрло саска шуэш. Шокшо кечыште канаш пеш сай.
Светлана АРХИПОВА, Россий писатель ушемын Марий Элысе пӧлкажым вуйлатыше:
– Шокшо игечым эре вучем, но путырак шокшыжат сай огыл. Каныш жапыште пӱртӱсыш лекташ тыршем. Окна ончылнем пеледыш-влакым шынденам, садан кечан годым тушто вӱдым шавем, шӱкым кӱрам. Пеледыш коклаште кок розам уло. Ӱмаште шындымем моткоч сайын пеледалтын да ончен куанем.
Чот шокшо годым уремыш лекташ пешыжак ом тырше: компьютер воктене шке пашамым шуктем. Теве кодшо гана, мутлан, йодмо почеш мурым кусарышым, марлаҥдышым, тидат вет жапым налеш.
Шокшо игечыште утларакше годым тӱрлӧ саскам, тыгак сливым, персикым налам.
Лариса ЕМЕНГУЛОВА-КУЗЬМИНА, Шернур посёлкысо А.Конаков лӱмеш тоштер-ончер комплексын этнографий пӧлкажым вуйлатыше:
– Тений кеҥежын тӱҥалтышыжак шокшо ыле, туге-гынат тыгай игечыште ятыр пашам шукташ лиеш. Каныш кечылаште але отпускышто улмо годым утларакшым пӧрт кӧргым эрыктем. Лишыл жапыште, мутлан, телылан шапашым ямдылаш тӱҥалам. Ятыр жапым пакчаште лияш, тӱрлӧ саскам, а эн чотшо эҥыжым, погаш да чылажымат тамлен ончаш йӧратем.
Сылне кеҥеж кечын мӧҥгыштӧ шинчыме йӧршын огеш шу, чон эре ала-куш, пӱртӱсыш ӱжеш. Тунам шоналтет: «Арам огыл ме марий калык улына –
пӱртӱсын икшывыже…». Пич, шокшо кечан игечыште ӱмыл полша. Тыге, мутлан, шочмо суртыш, паша деч вара толын, пушеҥге йымалне улшо теҥгылыш шинчын, мотор пӱртӱсым ончаш келша, а тунамже умылет: мемнан кундем деч шерге нимоат уке.
А.БАЙКОВА
Авторын фотожо
