Марий Тиште кечым палемдыме мероприятий годым «Шочмо кундемем – чон пӱрымашем» регион-влак кокласе краеведений конкурсым иктешленыт.
Тудым эше кодшо ий октябрьыштак МарНИЯЛИИ Марий калык конгресс дене пырля увертареныт ыле. Конкурс Россий Федерацийыште Науко да технологийын луияшыжлан да Педагогын да наставникын идалыкыштлан пӧлеклалтын.
«Шочмо вер эн чевер» номинацийыште икымше верыш Татарстан Республикын Кукмарий районысо Уял школжын 7-ше классыштыже тунемшыже Елизавета Исламова, кокмышо верыш Марий кугыжаныш университетын 2-шо курсын студенткыже Лиана Семенова, кумшыш тыгак Уял школын 10-шо классыштыже тунемше Яна Ишимова да Йошкар-Оласе 3-шо №-ан школын 3-шо классыштыже тунемше Ксения Иванова лектыныт.
«Нунын дене кугешнена» номинаций Марий кугыжаныш университетын 2-шо курсшын студенткыже Алина Милютиналан икымше верым, Курыкмарий районысо Кузнецово школын 6-шо классыштыже тунемше Анастасия Мишаковалан, Волжский районысо Памар селасе 8-ше классыште тунемше Ульяна Эрвиновалан да Шернур районысо Шӱдымарий школын 9-ше классыштыже тунемше Арина Петуховалан кокымшо верым конден. Кумшо верыште Марий кугыжаныш университетын 1-ше курсшын студенткыже Диана Семёнова ден Марий Турек районысо Хлебниково школын тунемшыже Екатерина Иванова лийыныт. Сеҥыше-влаклан дипломым кучыктеныт.
Снимкыште: Алина Милютинан — икымше вер.
М.Скобелевын фотожо.
