Республикыште регион-влак кокласе кӱкшытан тыгай краеведческий конкурсым увертарыме.
Организаторжо-влак – В.М.Васиьев лӱмеш МарНИИЯЛИ, Марий калык конгресс, «Марий Эл» увер агентстве да Шочмо йылмым туныктышо-влакын ассоциацийышт. Учредительже – Марий Элын Тӱвыра, савыктыш да калык-влакын пашашт шотышто министерствыже.
Конкурс Марий АССР-н калык поэтше Геннадий Матюковскийын шочмыжлан 100 ий теммылан пӧлеклалтеш. Российыште марий калыкын тӱшкан илыме кундемлаж гычат школышто, кыдалаш да кӱшыл тунемме заведенийлаште шинчымашым погышо-влак ушнен кертыт.
Ныл номинаций темлалтын: «Шочмо йылме – мемнан поянлыкна; «Чонеш вӱчкен лукмо ой» (Геннадий Матюковскийын творчествыж нерген шымлымаш паша); «Ме нунын дене кугешнена; «Фронт гыч серыш-влак».
Йодмашым да конкурслык пашам 15 ноябрь марте kugarnya2015@mail.ru электрон почтыш колтыман. Иктешлымашым Марий тиште кечылан пӧлеклалтше торжественный мероприятийыште ыштат.
Снимкыште: кодшо ийын эртарыме конкурсышто ойыртемалтше-влак организатор-влак дене пырля.
Фотом МарНИИЯЛИ-н воткыл лаштыкше гыч налме.
