Марий Элыште коваште ракым – меланомым – тÿҥалтыш йыжыҥыште рашемдаш полшышо «Шочмо палым онлайн терге» чат-бот-влак пашам ыштат.
Меланомо ракын ик эн осал формыжлан шотлалтеш. Тудо изиак метастазлан амалым ыштен кертеш – тунамже черым чактараш огеш лий гаяк. Но меланомым вияҥаш тÿҥалме йыжыҥыштак рашемдаш гын, специалист-шамычын аклымышт почеш, 100 гыч 90-95 процент ужаш еҥын илышыжым арален кодаш лиеш.
Системын куд йодышыжлан вашештен, чат-ботлаште кажне еҥ шкенжым шке терген кертеш. Тест-системым Черым рашемдыме «АККОРД» россий методике негызеш ямдылыме.
Чат-ботлаште чер да шкем шке шымлыме правил-влак нерген радамлынрак пален налаш лиеш.
Чат-бот-шамычым землякна IT-разработчик Сергей Якунин Марий Элын Регионым виктарыме рÿдержын полшымыжо да Марий Эл ден Хабаровск крайын медицине специалистыштын участвоватлымышт дене ямдылен. Негызлан Стратегический тÿҥалтыш-влак агентствын «Смартека» платформыжын «Шочмо палым онлайн терге» практикыжым налын. Тудо 2021 ийыште Тазалык аралтыш аланыште эн сай практике-шамычым ойырен налмашын «Первичный (амбулаторный) медико-санитарный полыш» номинацийыштыже кокымшо верым сеҥен налын.
Чат-бот-влак пайдаланыше-шамычлан йöнан улмышт дене сай улыт: смартфоныш у приложенийым шындаш да тудын функционалжым лончылаш огеш кÿл. Сервис дене пайдаланашлан келшыше мессенждерыш але социальный кылыш пурен, тестированийым эртымат сита.
Россий Федерацийын субъектлаштыже кучылталтше аналог-влак, куштыжо шочмо палын фотожым колташ, «лÿдыкшö шижмашым» палемдаш йодыт, тиде сервис деч начаррак улыт. Икымше, шочмо палым аклаш фотон начар качествыже чаракым ыштен кертеш. Кокымшо, шкем шке шымлыме шотан диагностикым эрташ медик огеш кÿл. Кумшо, тиде технологий телемедицине консультацийлан огеш шотлалт.
Икманаш, шочмо палым шке шымлыме йöн таче кечылан ик эн сайлан шотлалтеш.
Тестированийым эртыме годым медицине организацийыш мияш кÿлешлык лектеш гын, чат-бот поликлиникын адресше ден телефонжым увертара.
Кызыт сервис Телеграм мессенджерыште (https://t.me/rodinka12rus_bot), ВКонтакте социальный кылыште (https://vk.com/rodinka12rus_bot) да Алиса йÿкан полышкалышыште (https://dialogs.yandex.ru/store/skills/9fb5092e-prover-rodinku-marij-el/, але «Алиса, запусти навык проверь родинку Марий Эл» манмат сита) пашам ышта.
Ончыкыжым чат-бот-влак Viber, Instagram мессенджерлаште да йÿкан полышкалышылаште пашам ышташ тÿҥалыт.
М.ИВАНОВА
