Кажне ийын Россий студентын кечыжлан Татьяна лӱман студентке дене палдарена. Ты ганат тиде йӱлам огына пудырто. Тачысе унана – Марий кугыжаныш университетын икымше курсыштыжо шинчымашым погышо Татьяна Михайлова.
Южыжо «але икымше курс веле» малдалеш дыр, но ты шотышто таче ӱчашашат лиеш. Вет лач школ деч вара илышын кугорнышкыжо икымше ошкылым ыштыме годым, студент-влакын радамышкышт ушнымеке, шкендым вес семын шижат, шуко уым пален налат – еҥ-влак нергенат, илыш шотыштат. Кунамже шкем кучымаштат ала-мо шотыштыжо шоналташ логалеш. Икманаш, лач икымше курсышто тунемме годым кажне кече мом-гынат оҥайым конда, палыдыме дене палымым ышта. Варажым шукыжо мондалтешат, но ты пагыт ӱмырешлан шарнымашеш кодеш…
Лач тыгай шонымаш авалтыш мыйым яндар волгыдо шинчаончалтышан, шкенжым скромнын да тыгодымак пеҥгыдын кучышо, кажне шомакшым шоналтенак ойлышо тиде марий ӱдыр дене вашлиймаш годым.
Татьяна Морко район Чодыраялыште шочын-кушкын, шинчымашым Коркатово лицейын физике-математике классыштыже поген. Нине предмет-влак тудлан эреак келшеныт.
– Мый чот шуко йолын кошташ да куржталаш йӧратем – таҥасымашлаш кумылын ушненам… – шыргыжале ӱдыр.
Туге гынат Татьяна Марий кугыжаныш университетын Калыкле тӱвыра да тӱвыра кокласе коммуникаций институтышкыжо тунемаш пурен, англичан да шочмо йылме-влак дене педагог лияш ямдылалтеш.
– Мый шочмо марий йылмем сайынрак тунемнем, тыгак марий фольклорым шымлынем. Лицейыште физике да математике классыште коштынам, мемнан профиль дене марий йылмым туныктен огытыл. Сандене мутланыме йылмым гына палем, – ойла Татьяна.
Ӱдырын студент-влакын радамышкышт ушнымыжлан вашке вич тылзат лиеш, тудо вузын тӱшкагудыштыжо ила. Могайрак шижмаш? Тачысе студент могайрак? Тиде йодышем-влакланат Татьяна вашештыш:
– Сай шижмаш. Чынжым ойлаш гын, мый тугай активист омыл. Но кунам иктаж-мом ышташ шонымашем да кумылем улыт – тудым ыштем. А студент илыш шижалтеш. Тачысе студент шукыжым шканже тырша. Ончыкылыкшылан мо кӱлешым пала, сандене тиде шонымашыш шуаш тырша – келшыше образованийым налнеже. Мыйын умылымаште, тыгак лийшаш, вет келге шинчымашан айдемылан вияҥашыже йӧн шукырак. Сандене тунемман. Кеч-могай пашаш пурымо годым эн ончычак могай образованийым налмым шотыш налыт, а вет келге кӱшыл образованиян еҥ кеч-куштат кӱлешан. Кызыт мыланем тиде тӱҥ – тиде мыланем эн тӱҥ. Кызыт тиде эн тӱҥ. А вара кушко шонем, тушко пашаш пураш тыршаш.
Татьяна, ме тыйым Россий студентын але Тачанан кечыже дене саламлена да чыла шонымашыш шуаш тыланена!
Г.Кожевникова
Михаил Скобелевын фотожо
