УВЕР ЙОГЫН

«Шочмо кечемлан – чапле пӧлек!»

Кажне пелийын ме «Марий Эл» ден Сурт-пече» газетна-влаклан возалтше-шамыч коклаште тӱрлӧ пӧлекым модылтена. Шукерте огыл тидлан угыч лотерейым эртарышна да подписчикна-влак коклаште ик эн пиалан-влакым рашемдышна манаш лиеш. Чынак тыге огыл мо? Вет кеч-могай пӧлекат – куан да шкешотан пиал!

Ты гана призым сеҥен налше-влак кокла гыч иктыже – Советский район Ӧрша села гыч Роза Геннадьевна Антропова. Тудлан «Амарис» фирме деч 5 тӱжем теҥгеаш сертификат логалын! Саламлена!

Сеҥышына дене ме газет редакцийыш пӧлеклан толмыж годым вашлийын мутланышна.

Палдарымыж почеш, Антроповмыт еш «Марий Эл» газетнам 1988 ий годсек налеш. Лач тунам Роза Геннадьевна Н.К.Крупская лӱмеш Марий кугыжаныш пединститутым тунем пытарен да Ӧрша школышто пашам ышташ тӱҥалын.

– А тымарте ачам, Геннадий Павлович Павлов, «Марий Эл» да чыла моло марла изданий-влаклан подпискым ыштен. Тыге вараже тудак нунылан  шӱмаҥден, – каласкала лудшына. – Кызыт гын верысе почтышто палат: ынде мыят кажне пелийлан нине изданий-влакланак подпискым ыштем да сандене квитанцийым эсогыл возен ямдылат.

Эшежым илымыж годым ачам газетда дене пеҥгыде кылым кучен, чӱчкыдынак возен. Статьяже лекмым ужеш да моткочак куана ыле. А кызыт  мый жапын-жапын серен колтем. Тидланат ачам кумылаҥден. «Роза, возен моштет. Газетлашке колташ тӱҥал», – ойлен. Темлымыжым шотыш налынам да марий изданийлашке сераш кумылаҥынам. А кунам мыйын статьям-влак савыкталтыныт, тудым ужмекше, ачам моткоч йывыртен. Газетым эн ончыч тудо пурта, шергал лектеш, возымем ужеш да куанен ойла ыле: «Ончо, Роза, статьят лектын!» Но пытартыш жапыште возаш изиш ӧрканаш тӱҥалынам. Школышто паша шуко, да возаш ярсаш нелырак лийын. А такшым шкеже газетыште савыкталтше материал-влакым чӱчкыдынак уроклаштем кучылтам. Вараже, лудмеке, Ӧрша селасе книгагудыш намиен пуэм.

Антроповмыт еш газетнам ятыр ий налеш гынат, лотерейыш ушнаш квитанцийым тений кумшо гана веле колтен. Да вигак пӧлек логалын! Эшежым могай?! Ик эн чапле!

– Паледа, квитанцийым колтымем годымак ушыштем шонымаш шочын: «Тений шочмо кечем лӱмеш садак иктаж-мо модылтеш». Тыгак лие: шочмо кечемже икымше январьыште да тыгай сай приз логалын. Тидлан моткоч куаненам! – кумыл нӧлтын, каласыш Роза Геннадьевна. – Адакшым вет лотерейым эртарыме да тушто кӧн мом модын налмыж нерген возымо статьяжат тыге маналтын: «Лудшо-шамычлан – у ий пӧлек». А мыйын У ийлан веле огыл, эше вес пайремемланат чапле пӧлек лийын!

Лотерейыште модын налмем нерген Советский районысо Михайловка школышто туныктышо, ондакысе пырля тунемше йыҥгыртен каласыш да тиде увер дене куандарыш, вет мыйже газетым эше налын омыл ыле. Почтальонко варарак пыштен да ужын шуктен омыл.

Газетнан тӱҥ редакторжо Александр Абдуловын газет редакцийыштына сертификатым кучыктымекше, пӧлекым модын налшына вигак «Амарис» мебель салоныш каяш шонымыж нерген ойлыш. Оҥай, миен шуын мо? Мом налын?

– Салоныш миен шуынам, – йывыртен палдарыш. – Тушто кухньылан изирак ӱстембалым ышташ йодмашым пуэн кодышым.

– Тугеже ынде кажне гана кочкаш, чайым подылаш шичмыда годым эре мемнан «Марий Эл» газетнам шарнаш тӱҥалыда! – маньым.

– Туге! – йывыртен вашештыш тудо.

– Роза Геннадьевна, призым модын налмыда дене эше ик гана уло кумылын саламлена! Ончыкыжымат мемнан поро йолташна лийын кодаш да газетна дене тыгаяк пеҥгыде кылым кучаш тыланена! – ойлышым мутланымашна мучаште. Сеҥышына тауштыш да тыгак лиеш манын сӧрыш.

Любовь Камалетдинова

Авторын фотожо

Опубликовать в Одноклассники

Добавить комментарий