Ешыште икшыве шочмеке, лӱмым пуымо йодыш кужу жап шонаш тарата, южгунам каҥашымашымат луктеш. Марий артист, мурызо-влак йочаштлан могай лӱмым да лачшымак молан тыгайым ойырен налыныт?
Владимир Аптулаев, Марий Эл радион журналистше:
— Йоча шочмеке, молан руш лӱмым пуаш? Вет тыгай лӱманже — 100 дене еҥ. Марийынат йоҥгыдо лӱм-шамыч улыт. Марий лӱмым йоча-шамычлан пуаш пелашем ондак кумылаҥын. Садлан тиде шотышто нимогай кокытеланымаш лийын огыл. Лӱмын ачалӱм дене йоҥгымыжымат келыштараш тыршенна. Пелашем Олык Ипайын «Яндияр» поэмыжым лудмо деч вара эргыланна Яндияр лӱмым пуаш шонен пыштен. Мыланем темлен, мый ала-молан ондак келшен омыл. Жап эртымеке (ты лӱм нерген йӧршын монденам), «Яндияр лӱмым пуаш ала?» — маньым. Пелаш воштылеш: «Мый тыланет шукертак темленам ыле» Тыгай мыскара лийын кайыш. Вес эргыланнат Онар лӱмым пырля каҥашен пуымо. Яндияр, Онар лӱман мемнан талешкына-влак лийыныт. Коктынат марий калыкым ончыко вӱдаш тыршеныт, тушманын ваштареш шогымыжым кертме семын чактарен шогеныт.
Марий Эл радион хит-парадше
Йолташ-влак, тендан полшымо дене кодшо арняште мурызо-шамыч коклаштышт тыгайрак «тошкалтышым» чоҥеныт.
- Марина Кириллова – «Тылат, пелашем».
- Ший Алиса – «Пайрем кумыл».
- Галина Якушева – «Шочмо кече».
- Руслан Никифоров – «Шыже».
- Олег Славин – «Ужынам, йӧратенам».
А.БАЙКОВА
