Республикысе кӱшыл образованийым пуышо организаций-влакын ректорыштын заседанийышт лийын.
Каҥашымашын тӱҥ йодышыжо школ, вуз да паша верым пуышо кокласе вашкылым вияҥдыме нерген лийын.
Кызыт кундемыштына целевой тунеммаш модель илышыш шыҥдаралтеш. Пытартыш ийлаште выпускник-влак кокла гыч шагалынже огыл Иктешлыше кугыжаныш экзаменлан математике да естественно-научный профилян предметлам ойырат. Специалист-влакын мутыш почеш, тиде комплексно пашам ыштымын лектышыже.
2024 ийыште Марий Элыште 7 муниципальный образованийыште 32 инженер класс почылтын. Тений тыгайже – 35, тушто 400 утла удыр-рвезе тунемеш.
«Тиде направлений дене пырля пашам ыштымым умбакыже шуйыман. Пырля гына ме сай лектышыш шуын да регионысо образований системым жапын йодмыж семын вияҥден кертына», – палемден республикын образований да науко министрже Лариса Ревуцкая.
Г.Кожевникова
Фотом Марий Эл образований да науко министр Лариса Ревуцкаян соцкылысе лаштыкше гыч налме
