Марий Элыште школ-влакым капитально олмыкташ ик миллиард утла теҥге ойыралтеш.
Марий Эл образований да науко министр Лариса Ревуцкая республикым вуйлатыше Юрий Зайцевлан кундемыштына 2025 ийыште школ-влакым капитально олмыктышаш паша дене палдарен. Тудын увертарымыж почеш, тений «Молодёжь да йоча-влак» нацпроектын «Чыла сайым – йочалан» федеральный проектше дене келшышын, 9 тунемме верым капитально олмыкташ палемдыме. Тидлан чумыр налмаште ик миллирд утла теҥге ойыралтеш.
Тунемме да туныктымо инфраструктур Шернур, Кужэҥер, Марий Турек, Курыкмарий районласе, Йошкар-Оласе 10-шо №-ан, Семёновка селасе В.С.Архипов лӱмеш школ-влак, Волжск оласе лицей да Руэм посёлкысо Шуко профилян лицей-интернат уэмдалтшаш. Палемдыме тунемме верлаште класслам, кочмыверым, актовый залым да молымат уэмдат, тыгак йоча-влаклан йӧнан кумдыкым ыштат.
Дизайн-проект-влакым ямдылымашке Юл кундем кугыжаныш технологий ден Марий кугыжаныш университетын студентше-шамычым ушеныт. Нуно Руэм посёлкысо Шуко профилян лицей-интернатлан, Волжск оласе лицейлан да Марий Турек районысо Мариец посёлкысо школлан проектым ыштат. Кызытсе жаплан келшыше тунемме кумдыкым ыштымашке ушнаш Россий кӱкшытан «Школа мечты» марафон йӧным ышта.
Ушештарена, образованийын школ системыжым уэмден вияҥдыме шотышто президент программыш Марий Эл 2022 ий гыч ушнен. Тиде жап гыч кызыт марте регионыштына чылаже 25 общеобразовательный организацийын оралтыжым капитально олмыктымо.
Марий Эл вуйлатышын пресс-службыжын уверже негызеш Галина Кожевникова ямдылен