Марий Элыште капитально олмыкталтше тунемме вер-влак кокла шот дене налмаште 93 процентлан ямде улыт.
Школлам, йочасадлам, техникумлам уэмдым паша дене Марий Элым вуйлатыше Юрий Зайцевлан республикн образований да науко министрже Лариса Ревуцкая палдарен.
«Капитально олмыктымо паша сай качестван лийшаш да палемдыме жапыште мучашлалтшаш. Тунемме вер-влак лӱдыкшыдымӧ да йӧнан лийшаш улыт», – каласен регионым вуйлатыше.
«Молодёжь да йоча-влак», «Еш» нацпроект-влак почеш тений Марий Элыште чылаже 28 тунемме верым уэмдаш палемдыме: 19 школым, 5 йочасадым да кыдалаш профессионал образований тӧнежын 4 оралтыжым. Тидлан 2026 ийыште 1,8 миллиард утла теҥгем ойырымо.
Объектлаште капитально олмыктымо паша мучашке лишемеш, 17 июльлан нуно кокла шот дене налмаште 93 процентлан ямде улыт.
Тунемме верлам уэмдымаш «Единый Россий» партийын Калык программыжын кӱлешан ужашыжлан шотлалтеш. 2022-2025 ийлаште Марий Элыште 40 тыгай оралтым капитально олмыктымо.
Марий Элым вуйлатышын администрацийжын пресс-службыжын уверже негызеш Галина Кожевникова ямдылен.
Фотом Марий Элым вуйлатышын администрацийжын пресс-службыж гыч налме.
