16 апрельыште Йошкар-Оласе Чарла кремльыште «Марий Элыште ыштыме» шошо ярмиҥга лиеш.
Уна-влакым эрдене 8 шагатланак вучаш тӱҥалыт. Тиде кече там, качестве да калык мастар пайрем семын лиеш. Марий Элнан рӱдолаштыже илыше да уна-влаклан кочкыш сатум верысе предприятий, тӱшка ден фермер озанлык-влак темлаш тӱҥалыт. Тышке Россий кӱкшытан «Шӧртньӧ шыже» выставкыште ойыртемалтше-влакат шке сатуштым кондат. Ярмиҥгаште шыл ден шӧр гыч ямдылыме кочкышым, мӱйым, сырым, колбасам, тутло киндым, мӧҥгыштӧ кӱэштме когыльым, шудо чайым, эмлык шудым темлаш тӱҥалыт. Декоративный творчестве мастар-влак ужалымашке сурт кӧргыштӧ кучылталтше арвер-влакым луктыт.
Погынышо-влакын кумылыштым оҥай программан концерт нӧлталшаш.
Вячеслав Смоленцевын фотожо.
