1 апрель гыч Российысе чыла школышто 1-ше классыш тунемаш йодмашым налме кампаний тӱҥалын. 2022 ийыште илышыште икымше гана парт коклаш кок миллион ӱдыр-рвезе шинчеш.
Икымше классыш кунам возалташ лиеш?
Йодмашым налме паша кок этапан лиеш: икымшыже – 1 апрель гыч 30 июнь марте. Тиде жап – школ пелен пеҥгыдемдыме кумдыкышто илыше, тыгак черет деч посна школыш налме радамыште улшо йоча-влаклан.
Кокымшо этап – 6 июль гыч 5 сентябрь марте. Тиде жапыште илыме кумдыкышо огыл, а вес районысо школыш йодмашым пуаш лиеш.
«Йочам икымше классыш возаш кызыт моткоч йӧнан. Чыла регионыштат ача-ава-влаклан икмыняр вариантым темлыме. Школышкат обязательно толаш ок кӱл – цифран сервислан эҥерташ лиеш. 2022 ийыште икымше классыш кайышаш ик икшыват парт коклаш шичде ок код», – каласен Россий Федерацийысе Просвещений министр Сергей Кравцов.
Могай йоча черет деч посна пураш праван?
Интернатан общеобразовательный организацийлаште судья, прокурор, Следственный комитетын пашаеҥже-влакын икшывыштлан вер черет деч посна пуалтеш.
Эн ончычак могай икшывым школыш налыт?
Тыгай праван военнослужащий, полицийыште да элкӧргӧ паша органлаште тыршыше, тыгак ФСИН, ФССП, ФТС-ын, пожар ваштареш кучедалше службын пашаеҥже-влакын йочашт улыт. Тичмаш спискым кӱштымашыште ончыктымо.
Йодмашым кузе пуаш?
Тений тидым вич йӧн дене ышташ лиеш:
- Школыш мияш да йодмашым возаш.
- Йодмашым почто гоч кучыктымо нерген уведомлениян серыш дене.
- Школын увер системыже але файлым школын электрон адресышкыже колташ.
- Регионысо увер системе полшымо дене.
- Кугыжаныш услугын единый порталже гоч.
Школыш огыт нал гын, мом ышташ?
Яра вер кодын огыл гын веле кугыжаныш але муниципальный школ тидым ыштен кертеш. Но тыгодым тудо ача-авалан вес школышто верым муаш полышым пуышаш улыт.
Йошкар-Оласе образований виктемын увертарымыж почеш 4 апрельлан школыш тунемаш пураш кум тӱжем наре йодмаш пурен, шукыжым образовательный портал гоч пуымо.
Г.Кожевникова
