Ижевскыште Удмурт Республикысе Калык-влак келшымаш пӧртыштӧ «Шкемын ешем дене кугешнем» регион-влак кӱкшытан конкурс эртен.
Тудо Марий талешке кечылан да Ешдалыклан пӧлеклалтын. Мероприятийым «Одо марий ушем» ден «Ижевск мари» мер организаций-влак иквереш эртареныт. А вуйлата нуным ынде 1991 ий гычак чолга марий, Удмурт Республикысе тӱвыран сулло пашаеҥже Николай Ямаков.
Конкурсыш чылаже Удмурт, Татарстан республикла, Киров область гыч 9 марий еш ушнен. Нуно ял ден олала гычат лийыныт. Организатор-влакын ончылгоч палемдыме условийышт почеш кажне ешлан шкем ончыкташ полшышо тӱшкам конден, ӱстел чесым ямдылен. Жюри еш-влакын усталык шӱлышыштым, кидпаша мастарлыкыштым аклен.
Николай Ивановичын палемдымыж почеш, конкурсым участник-влак вученыт да сайын ямдылалтыныт. Мероприятий жапыште чылан пырля ик кугу ешыш савырненыт. «Одо марий ушем» ончыкшымат нунын дене кылым кучаш да шке мероприятийлашкыже ӱжаш тӱҥалеш.
Тыгай конкурсышто чыланат сеҥыше улыт, каласыш Н.Ямаков. Санденак кажне ешым сеҥыше семын посна номинацийыште палемденыт. Иктыштым «Эн мотор мужырлан», весыштым «Эн уста ешлан» але «Кумылым эн чот налын моштышылан» шотленыт да пӧлек ден дипломым кучыктеныт. Шуко шочшан, еш йӱлам шуйышо да моло семын ойыртемалтше-влакымат палемденыт.
Пайрем касым «Шочмо вож» марла куштышо, «Йоҥгалт, гармонь йӱк», «Варале сем» коллектив-влак сӧрастареныт.
Снимкыште: конкурсыш ушнышо-влак
Фотом «Одо марий ушемын» лаштыкше гыч налме.
