1-31 июльышто Марий Элысе вӱд объектлаште лӱдыкшыдымылык тылзе эрта.
Мероприятий вӱдыштӧ лийын кертше туткарым кораҥдымашке да еҥ-влакын йӱштылаш пурымышт годым шкем кузе кучаш кӱлмӧ шотышто шинчымашыштым пойдарымашке виктаралтын. Тидын денак кылдалтыныт тылзе жапыште республикыштына эртарыме профилактике мероприятий-влак.
Олаласе ден республикысе пляж-влакын могай улмыштым патрулироватлат. Тыгак йӱштылаш келыштарыдыме, но еҥ-влакын канаш кошташ йӧратыме верлаште йоча-влак кугыеҥ-шамыч деч посна, але йӱшӧ-влак ынышт лий манын тергымашым эртарат.
Муниципал образований вуйлатыше-влакланат тидын шотыштак калыкыште профилактике пашам вияҥден колташ, яллаште погынымаш-влакым эртараш кӱштымӧ. Поснак кугу тӱткышым икшыве-шамычлан ойырат.
Тений гына республикысе вӱд объектлаште 6 еҥ илыш дене чеверласен, коктынжо икшыве лийыныт. Июль тӱҥалтыште Медведево район Сенькан ял воктене Изи Какшан эҥерыште, йӱштылаш келыштарыдыме верыште, кум рвезе вӱдыш пурен. Коктынжо ийын моштеныт. Ийын моштыдымыжак сер гыч вӱдыш тӧрштен да мӧҥгеш лектын огыл. Йолташыже-влак тудым утарен кертын огытыл.
Ушештарен кодыман, Марий Элын законодательствыж дене келшышын, йӱштылаш келыштарыдыме да йӱштылаш чарыме нерген увертарыше палым шогалтыме верлаште вӱдыш пурымылан административно мут кучаш шогалтат: але шижтарат, але 1500 гыч 2000 теҥге марте штрафым тӱлаш пуат.
