Пайрем дене!
Умылен да ваш полшен
Ӱдырамаш – илышым пуышо да ӱшаным ешарыше айдеме. Тудо умылышо лиеш гын, кумылет нӧлталтеш, полшаш келша гын, пашат ушнен толеш. Пелашем Любовь Борисовна кумылжым ончыктыш, да ме тӱҥалтыш гычак Шӱргынур ялыштына шуко вольыкым ашнаш пижна, кызытат ты паша деч йӱкшен огынал. Тидын кӱшешак чапле сурт оралтым нӧлтен шындышна. Йоча-влакым пашалан кумылаҥден куштена.
Тыгодымак коктынат тӱшка пашам ыштена: мый – «Восход» колхозын кокымшо отделенийжым да тусо фермым вуйлатышылан, пелашем – Арбор тӱвыра пӧртын культорганизаторжылан да кидпаша кружокым вуйлатышылан. Тидат веле огыл, тудын умылен да полшен шогымыжак мылам Карлыган ял илемым вуйлатыше, район погынымашын депутатше, тыгак ялыштына кевытым кучышо амалкалче сомылым шукташ вийым пуа.
Сандене, Ӱдырамаш кече дене пайдаланен, пелашемлан чыла шотыштат таум ыштем. Еш илышна пиалан лийже, йӧратымашна ынже йом, йоча ден уныкана-влак куандарышт! Родо тукымланат сайым гына тыланем.
Арбор ӱдырамаш-влаклан, ты кундемынак шочшыжо, Марий Элын калык артистше Светлана Сергеевна Сушкиналан, Карлыган ял илем калыклан пайрем саламлымашым колтем. Таза да пиалан лийза, йӧратен илыза!
Феликс ПРОХОРОВ,
Марий Турек район Арбор кундемын пашаче еҥже.
Снимкыште: Феликс Прохоров, Светлана Сушкина да Любовь Прохорова.
Еш альбом гыч налме фото.
Мужыр лаштыкым Юрий ИСАКОВ ямдылен.
