Вашке пакча тургым тӱҥалеш. Озавате-влак тидлан эше теле-шошымак ямдылалтыт: нӧшмым налыт, окна ончылнышт але волгыдырак иктаж верыште тӱрлӧ росотам куштат.
Те пакчаштыда шуко пакчасаскам куштеда мо? Ончылгоч могай росотам ямдыледа? Пакча тургымлан кузе ямдылалтыда?
Венера ЮЗЫКАЙН, Йошкар-Оласе 28-ше №-ан лицейын англичан йылме дене туныктышыжо:
– Ешна кугу, садлан пакча деч посна нигузе ок лий: шке ончен куштымо кешыр, йошкарушмен, ковышта, кабак, кавун, кияр, шере пурыс, тӱрлӧ ужар кушкыл да тулеч молат кужу жап еш казнанам аныклаш полшат. Помидорым моткоч йӧратена, садлан шукак шындена, эсогыл У ий пайрем ӱстембакат шке пакчасе свежа помидорым луктына.
Пеледыш кокла гыч эустома, лобелия ден петуния нӧшмым февраль тылзе тӱҥалтыштак ӱдымӧ. Шере ден кочо пурысым, баклажаным, южо сорт черри помидорым пикироватленам. Теве эртыше каныш кечылаште эше 10 наре сорт помидорым да икияш пеледышым ӱденам.
Май тылзыште ӱдаш кӱлшӧ нӧшмымат ямдыленам. Сандене пакча тургымым чон вургыж вучем.
Эльвира ПОПОВА, Марий Элын сулло артистше, мурызо:
– Мланде почылтмым чотак вучем. Пакчаш ӱдышаш нӧшмым чыла налынам. Ме чыла гаяк пакчасаскам куштена: шуко тӱрлӧ сорт шоганым, киярым, пареҥгым, чеснокым, кавун ден кабакым, тӱрлӧ шудым, кешырым, пеледышым. Пакчасаскам ончен кушташ пеш йӧратем. Шыжым нунын дене тӱрлӧ шапашым телылан ямдылем. Салатым ешыштем йӧратен кочкыт. Тений икымше гана «Эксибишен» сорт шоганым ӱденам. Тыгайже кугу да тамле, салатланат пеш келшен толеш, маныт.
Рита ТОЙШЕВА, Семёновка амбулаторийын врач-педиатрже
– Пакча тургымлан шыжымак ямдылалтына. Тений 18 «ямде пакча» авыртышым налынна. Тыге пакчажат мотор лиеш, тӱрлӧ пакчасаскам, кушкылым шындашат, шӱкшудым кӱрашат каньыле лиеш, шонем.
Пурыс, помидор, кияр росотам шкеак куштена. Пеледыш кокла гыч петунийым ӱденам. Тений виноградым ешарен шындынена, укшымат аралаш коденна. Чылажат шот денак лиеш манын ӱшанена.
Татьяна ШАБДАРОВА, туныктышо (Шернур район):
– Тӱрлӧ пеледыш, пакчасаска нӧшмым У ий деч ончычак интернет гоч заказатлена. Ме ялыште илена, садлан нуным эреак шындаш тыршена. Кажне ӱдырамаш пеледышым йӧрата, шонем. Мыят ты мотор кушкылым ончен куанем! Йырваш пеледалтмеке, кумдыкат волгыдырак лиеш, чон куана, ласкан чучеш.
Окна ончылно тыгак помидор, пурыс, кияр росота кушкыт.
Лишыл жапыште пакчаштат лум шулен пыта, вара паша тургым тӱҥалеш веле. Садлан кызыт эше пакчам логалмаш уке, а теве теплицым кодшо кечылаште ямдыленна.
Алевтина БАЙКОВА ямдылен
Фотом еш альбом гыч налме
