Марий Элын профессионалже-влак кундемнан чапшым начар тазалыкан-влак коклаште эртаралтше «Абилимпикс» национальный чемпионатыште аралаш тӱҥалыт. Тиде кечылаште регион кӱкшытан профессионал мастарлык чемпионатыште сеҥыше да нунын наставникышт дене республикым вуйлатыше Юрий Зайцев вашлийын.
Ушештарена, таҥасымаш тений шошым куд площадкыште лийын. Тушто чумыр налмаште 30 компетенций дене 200 утла участник моштымашым ончыктен. Тиде чот гыч Марий Эл правительствын грантше дене 28 еҥ да 32 наставник палемдалтын. Сеҥыше-влак кокла гыч куд участник Марий Элын чапшым Москваште эртыше Национальный чемпионатыште аралаш тӱҥалеш.
«Кандашымше гана эртаралтше профессионал мастарлык чемпионатыште кугу мастарлыкым ончыктенда. Сулен налме сеҥымаш дене тендам куанен саламлем. Мыйын шонымаште, преподаватель ден педагог-влакланат тиде кугу сеҥымаш. Куштылго огыл таҥасымаште те кӧргӧ куатым, пеҥгыдылыкым ончыктенда, ончылно шындыме цельыш шуында – профессионал заданийлам шуктенда. Тендан сеҥымаш – кыртмен тыршымашын лектышыже да, мутат уке, тиде шкан ӱшан да кугу кӧргӧ вий», – каласен сеҥыше-влаклан Юрий Зайцев.
Тудо палемден: «Абилимпикс» толкын кугыжаныш политикын ик эн кӱлешан ужашыжлан шотлалтеш. Тудо, тазалыкым шотыш налде, чыла граждан-влаклан илаш да пашам ышташ икгай йӧным ышташ виктаралтын.
«Таче толкын тазалыклан начар категорийыш пурышо еҥ-влакын профессионал могырым вияҥмышт дене кылдалтше задачым кӱлеш семын решатла», – палемден регионым вуйлатыше.
Тудо таҥасымашлан ямдылыше наставник-шамычлан кӱкшӧ профессионализмым ончыктымыштлан тауштен. Тидын деч вара нунылан да сеҥыше-влаклан грантым кучыктен.
«Икымше ошкылда, тудо сай лектышым пуэн. Республикын правительствыжлан да мыланем тиде – сеҥымаш. Вияҥза да эреак ончыко ошкылза», – мучашлен каласен Юрий Зайцев.
Марий Эл Республикым вуйлатышын пресс-службыжын уверже негызеш Г.Кожевникова ямдылен
