Ӱмаште Марий Элыште 38 еҥ вӱдыш пуренҥгаен колен, тений 10 июньлан тиде чот латиктыш шуын… Илышым наҥгайыше азапын тӱҥ амалжылан вӱдышкӧ йӱшывуя але палыдыме верыште пурымо шотлалтеш.
Пляжыште ма пӱртӱсыштӧ каныше-влакым эскеренрак ончалаш гын, шукышт спиртан напиткым подылаш кумылан улыт. Шокшо игече шӱм-вӱргорно системылан тугакшат кугу нагрузкым ышта, а айдеме, сырам але аракам йӱын, состоянийжым эшеат нелемда. Кече ванне деч вара эсогыл чылт таза айдемылан йӱштӧ вӱдыш вигак пураш огеш лий. Ӱмылыштӧ каналтыме, шӱм кундемым йӱштӧ вӱд дене йыгыме деч вара веле йӱштылаш темлалтеш. А йӱшӧ айдемылан вӱдыш йӧршын пураш чаралтеш, уке гын шӱм чогашыллан кок пачаш кугу нагрузко лиеш.
Подылшо айдеме лӱдмыжым чарна да кӱлдымашым ыштылаш тӱҥалеш: я келге верыш ийын кая, я вӱд йымак пура… Лишыл еҥда йӱшывуя йӱштылаш пурынеже гын, лучо чарыза. «Вӱдыш йӱшывуя пурышо еҥ – шкем пытараш ямдылалтше дене икте», – манеш ик мунло калыкмут.
Статистике почеш, ерлаште да эҥерлаште тӱҥ шотышто ийын моштышо пӧръеҥ-шамыч пуренҥгаят. Амалже – спиртан йӱыш, уто койыш, лӱдыкшӧ ситуацийыште шкем кузе кучаш кӱлмӧ правил-влакым палыдымаш.
Икманаш, вӱдыш йӱшывуя, тыгак шкем начарынрак шижме годым ида пуро. Лӱмын ойырымо, тергыме верлаште йӱштылаш тыршыза.
М.ИВАНОВА
