Марий Элын калык писательже, Марий Элын сулло журналистше, Морко район Шӱргыялын лӱмлӧ эргыже Леонид Логинович ЯНДАКЛАН (Яндаковлан) 10 декабрьыште 90 ий темеш.
Лӱмече вашеш 30 ноябрьыште Волжский район Пӧтъял кыдалаш школышто Л.Яндаковын «Ший калык» книгажын презентацийжым эртареныт. Тиде книга (Е.Л.Петрова, Т.Н.Беляева, В.Г.Петров ямдыленыт) кодшо ийын савыкталтын, тушко авторын тӱрлӧ ийлаште возымо 6 пьесыже пурен.
– Марий тӱняште шуко талешке уло, иктыже – писатель, публицист, журналист Леонид Яндаков. Арам огыл ме таче Юлсерыш толынна. Ты кундемын калык чотшо пешыжак кугу огыл гынат, тыште шукыракшым марий калык ила. Палем, нунын коклаште марий шӱлышан-влак ятырын улыт. Пӧтъял школышто, мутлан, самырык тукымым изинек пашалан туныктат, трудовой воспитанийлан, манына, кугу верым ойырат, тидат талешке койышым пеҥгыдемдаш полша, – каласен Марий тӱвыра рӱдер вуйлатышын сомылжым жаплан шуктышо Василий Петров да школ директор В.А.Семеновлан книга пӧлекым кучыктен.
«Ший калык» книга негызеш тӱвыра да шинчымашым пойдарыше программым пеш чаткан чоҥымо. Журналист Николай Любимовын «Мемнан мутна» проектше почеш ший нерген каласкалыше видеоматериалым, шанчызе-литературовед, критик Галина Бояринован писатель-юбилярын «Ший калык» пьесыжым эфир гоч аклен лончылымыжым, Л.Яндаковын илыш корныжым да творчествыжым почын пуышо кадр-влакым ик кышкарыш чумырымым иктешлен ончалаш гын, куанаш гына кодеш: серызын усталык пашажым калык коклашке теве кузе шараш лиеш! Тыгай программым культур да образовательный веле огыл, а эше просветительский манашат келшен толеш. Республикысе Марий тӱвыра рӱдерлан, «Мари ушем» мер организацийлан тыгай пашам шуктымыштлан таушташ гына кодеш.
Л.Яндаковын 90 ийым теммыжлан да Марий тиште кечылан пӧлеклалтше шкешотан книга пайрем (лач тыге ойлымо шуэш) ӱмаштак тӱҥалтышым налын. Тудым Йошкар-Олаште, Моркышто, Пошкырт кундемын кум районыштыжо ончыктеныт. Презентацийым кажне гана тележурналист, «ВийАР» мер ушемын вуйлатышыже Алена Иванова вӱда. Пӧтъялыш, мутлан, лӱмгечызе-писатель дене пырля пашам ыштыше йолташыже-влак: Марий радио службым вуйлатыше Вячеслав Кольцов ден жуналист Борис Шамиев миеныт. Муро кумылым Морко район Кугу Шале тӱвыра пӧртын «Ший оҥгыр» фольклор ансамбльже (вуйлатыше – Евгений Губернов), «У муро» студийын мурызыжо-влак Геннадий Григорьев ден Зоя Королева луктыныт. Шочмо школышкыжо тачысе жапын марий талешкыже Олег Бакутов толын.
Чаманаш логалеш, Леонид Логинович тыгай вашлиймашке лектын коштын ок керт. Тазалыкше начаррак. Шочмо Морко районысо Коркатово лицейыште «Марий юнкор» слётышто (2007 ий) йоча-влаклан краевед семын каласкалымыжым, Унчо школышко да моло вереат пырля миен коштмым шарна дыр, шонем. Лӱмлӧ мутмастар пелен лиймем мый кугу пиаллан шотлем.
Л.СЕМЕНОВА
Пагалыме Леонид Логинович!
«Марий Эл» газетын ончычсо пашаеҥже-влак да тачысе коллективше Тендам 90 ияш лӱмгечыда дене шокшын саламлат. Марий печатьым вияҥдымашке, марий калыкын йӧратыме «Марий коммуна» тӱҥ газетшын чапшым кӱшкӧ нӧлтымашке кугу надырым пыштымыланда, марий сылнымутым «Чоткар», «Мамич Бердей», «Онар» исторический роман-влак да шуко-шуко пьесе дене пойдарымыланда, ший марий калык верч тыршымыланда кугу таум ойлат. Кужу-кужу ӱмыран лийза!
