Калык усталык да тӱвыра ден каныме паша шотышто республикысе шанче-методик рӱдер 1999 ий годсек кок ийлан ик гана «Ший памаш» фестиваль-конкурсым эртара. Тений тудо Йошкар-Олаште 25 гыч 27 ноябрь марте лиеш.
Регион-влак кокласе финн-угор эстраде муро фестиваль-конкурсыш участник-влак кушечын толыт? Нунын мастарлыкыштым могай номинацийыште аклат? Тиде да моло нерген Калык усталык рӱдерын методистше Роза Искакова дене мутланышна.
– Роза Евгеньевна, фестивальыш мынярын да могай кундемла гыч участник-влакым вучеда?
– Усталык шӱлышан конкурсыш чылаже 38 йодмаш пурен. Комиссий, конкурсант-влак деч пурышо видеоматериалым тергымеке, финалыш 29 йодмашым ойырен. Нунын коклаште 16 гыч 35 ияш марте 8 солист: Ольга Николаева (Башкортостан, Янаул ола), Валерий Шамов (Марий Турек район), Евгений Иванов (Волжский район), Лариса Еменгулова (Шернур район), Руслан Капитонов (Курыкмарий район), Людмила Федорова, Виктория Мочалова да Аделина Батаева (Йошкар-Ола), а 36 гыч 55 ияш марте 11 солист: Сергей Зайнетдинов (Башкортостан, Краснокам район), Николай Несмелов (Одо кундем, Шаркан район), Павел Красильников, (Одо кундем, Алнаш район), Любовь Орлова (Звенигово район), Валерий Чиванов, Надежда Крылова, Надежда Степанова (Йошкар-Ола), Надежда Васканова (Волжский район), Валерий Петров (Морко район), Инна Килеева (Шернур район) да Василий Якимов (Медведево район) улыт.
– Мурышо ансамбль-влакат конкурсышто мастарлыкым ончыктат?
– 10 ансамбль ушна. Тиде – Одо кундем гыч «Зоринча», Озаҥ ола гыч Вероника ден Алинан дуэтышт, Волжский район гыч «Элегия», Оршанке район гыч «Ошла сем», Курыкмарий район гыч «Шӹндӹр», Килемар район гыч «Май», Провой кундем гыч «Юлас» дуэт, Кужэҥер район гыч Савельевмыт еш ансамбль, Морко район гыч «Куан памаш» ден «У вий».
– Солист-влак кокла гыч у лӱм-влакат йоҥгалтмыла чучо?
– Туге. Ольга Николаева, Надежда Степанова, Валерий Шамов, Надежда Крылова, Лариса Еменгулова икымше гана «Ший памаш» конкурсыш ушненыт.
– Конкурс деч посна участник-влакым мо вуча?
– Фестиваль-конкурс жапыште финн-угор эстрадын вияҥмыж нерген пресс- конференций, тыгак творческий лабораторий-влак эртат, «Ший памашын» участникше-влак дене жюри еҥ-шамыч конкурсышто йоҥгалтарыме муро шотышто ойлаш тӱҥалына. Марий Элыш толшо уна-шамычлан Йошкар-Ола мучко ончен кошташат оҥай лийшаш.
– Фестиваль кум кече шуйна. Молгунамсе семынак тудо икмыняр вере лиеш? Молан ик вере веле огеш эртаралт?
– Фестиваль-конкурсын икымше туржо кажне гана районышто эрта. Тений тудо 25 ноябрьыште Медведево посёлкысо тӱвыра полатыште лиеш. Тушто участник-влак эртыше курымын 70-90-ше ийлаште чапланыше муро-влакым мураш тӱҥалыт. Тидыже районласе калыклан финно-угор эстраде дене кумданрак палдарыме шонымаш дене эртаралтеш. Кокымшо ден кумшо кечылан фестиваль Йошкар-Олаш, Ленин лӱмеш тӱвыра полатыш, кусна. 26 ноябрьыште конкурсант-влак калык муро ден у мурым колышташ темлат, а 27 ноябрьыште «Ший памашын» сеҥышыже-влакым увертарат да лач нунак гала-концертыште мастарлыкым ончыкташ тӱҥалыт.
– Роза Евгеньевна, «Ший памаш» фестивальыш шкеат ятыр гана ушненат? Тылат тудо мом пуэн?
– Икымше гана ты конкурсыш участник семын школышто тунеммем годым, 1999 ийыште, ачам дене толынам. Тунам мылам ала-кушко логалмемла чучын. Чыланат сайын мурат, репертуарыштат, чийыме вургемыштат ойыртемалтеш, коллектив-влак дене вуйлатышышт пашам ыштат… Вара тӱвыра да сымыктыш колледжыште тунеммем годым 2003 да 2005 ийыште уэш шке вием тергаш шонен пыштенам. А 2007 ий гыч республикысе Калык усталык рӱдерыш пашаш толынам да организатор семын тыршаш логалеш. Тиде пашам моткоч йӧратем. «Ший памаш» гоч эртыше-влакын тау мутыштат шерге, вет южышт икмыняр гана почела ты конкурсыш ушнат. «Ший памаш» мастарлыкым таптымаште кугу полышым пуа, у шӱдыр-влакым чӱкташ полша.
А.Байкова мутланен
