ОБРАЗОВАНИЙ ШКОЛ ЙОЛГОРНО

«Шарнымаш сад»

Тений 28 апрель гыч Параньга районысо тунемме вер-влак «Шарнымаш сад» тӱнямбал акцийыш ушненыт. Тудын тӱҥ шонымашыже – 1941-45 ийлаште Кугу Отечественный сарыште вуйым пыштыше-влак лӱмеш пушеҥгым шындымаш, тыге элыштына илыше калык-влакын икоян улмыштым пеҥгыдемден вияҥдаш.

Параньга районышто акцийын тӱҥ площадкышкыже Пумарий тӱҥ школ савырнен. Тушто мероприятий торжественный линейке гыч тӱҥалын – Российын гимнже почеш флагым нӧлталме дене. Тулан жапыште шочмо мланде верч вуйым пыштыше-влаклан тауштымо мутым тунемме верым вуйлатыше А.Горохова, районысо образований пӧлкам вуйлатыше Н.Файзрахманова да пашан ветеранже Т.Калугина ойленыт. Торжественный линейке Украинысе специальный военный операций годым вуйым пыштыше Илья Мязиным шарныме «Минута молчания» дене мучашлалтын. Тидын деч вара тунемше-влак пӱнчым шынденыт. Кугу да кӱлешан пашам ыштымеке, туныктышо-влак чыла классыште Сеҥымаш урокым эртареныт.

Чылаже Параньга кундемысе тунемме верлаште 120 пӱнчым шындаш палемдыме. Тиде акцийыш верысе лесничествын «Габит» ООО-жым вуйлатыше И.Нигматзянов кумылын ушнен.

Г.Кожевникова

Фотом Марий Эл Образований да науко министерстве гыч налме.

Опубликовать в Одноклассники

Добавить комментарий