Марий Турек посёлкышто Кугу Отечестенный сар годым колышо туныктышо ден тунемше-влаклан уэмден омыктымо памятникым угыч почыныт.
Тиде событий Марий Турек районын 100 ияш лӱмгечыжым палемдыме годым лийын. Шке жапыштыже ты памятник-обелискым 1970 ийыште шогалтеныт. Тудын авторжо-влак посёлкысо школын туныктышыжо-влак Андрей Иванович Виноградов ден Анатолий Петрович Иванов лийыныт. А тений шарныктышым верысе инициативылан полшышо республиканский программе почеш уэмдаш йӧн лектын.
Тудым угыч почмо мероприятийыште педагогике пашан ветеранже, район администрацийын еҥже, Марий Турек школын кызытсе да ончычсо тунемшыже, туныктышыжо-влак лиыныт. Герой-шамычым шарналтен, ик тат шып шогымо деч вара шарныктыш воктеке пеледышым пыштеныт.
Светлана Носова
Снимкыште: памятникым угыч почмо годым.
Фотом райрӱдысӧ В.П.Мосолов лӱмеш краеведений тоштерын соцкыл лаштыкше гыч налме.
