Марий Эл Республикын Ветеринарий комитетшын специалистше-влакын шижтарымышт почеш, пытартыш жапыште шала коштшо пий-влак калыклан изи огыл лӱдыкшым ыштат.
Поснак йӱштӧ игече годым нуно кугу тӱшкаш ушнат да осалланат. Тыге нунылан кочкышым муаш да шкеныштым аралаш куштылгырак. Эшежым тыгай пагытыште нуно еҥ-влак ваштареш кержалт кертше лийыт. Сандене шала коштшо пий тӱшка нерген ола але район администрацийыш шижтарыман. Тусо специалист-влак тыгай уверым специализироватлыме организацийыш пуат. Садышт шала коштшо пий-влакым кучен, приютлаш вераҥдат.
Пий тӱшкам ужында гын, верлаште тыгай телефон номер дене шижтараш лиеш:
Йошкар-Олаште: 8 (8362) 600-336
Волжскышто: 8 (83631) 6-12-60
Козьмодемьянскыште: 8 (83632) 9-02-86
Звениговышто: 8 (83645) 7-15-30
Медведевыште: 8 (8362) 582 – 060
Шала коштшо пий тӱшкам вашлиймеке мом ыштыман:
• Кычкырлаш, кид дене лупшкедылаш, нунын деке туп дене савырнаш огеш кӱл. Лӱдмым ончыкташ, нунын деч куржаш огеш кӱл.
• Пий-влак тендан ӱмбаке опташ тӱҥалыныт гын, пушеҥге, пече але пырдыж деке тупынь савырнен шогалын, нунын лыпланымыштым вучыман.
• Пий-влакын оптен чарнымекышт, пеш эркын нунын деч кораҥ каяш тыршыман.
• Пий-шамыч тендам мландываке пуртен колтеныт гын, иктаж-могай вургем, сумка але моло наста дене шӱйым да вуйым петыраш тыршыман, кидым шылтыман да нунын лыпланымешке шып кийыман.
Ветеринар специалист-влак нине правил дене палымыда, шочшыда-шамычымат палдараш темлат.
Светлана Носова
Фотом «Маленькие друзья с большим сердцем» организацийын воткыл лаштыкше гыч налме
