КУЛЬТУР ДА ИСКУССТВО УВЕР ЙОГЫН

«Шӱвыр, тӱмыр сем почеш»

Тӱвыра увер

«Шӱвыр, тӱмыр сем почеш»

Тыге маналтын эртыше рушарнян Ленин лӱмеш тӱвыра полатыште «Ныжыл сем» фольклор ансамбльын концерт программыже. Шукынжо тудым «Чодыра сем» семын палат. 40 ий утла ончычак Калинин лӱмеш ДК пелен чумыргышо коллектив шке жапыштыже кумдан чапланен, концерт дене Татарстан, Удмуртий, Киров да моло кундемлашкат коштын, репертуаржым тусо муро да куштымаш денат пойдарен.  

Икмыняр ий ончыч тӱҥ состав гыч Петр Петухов, Светлана Васильева, Валерий Черепанов, Зоя Соловьева, Георгий Воронин да молат ансамбльым угыч погаш кумылаҥыныт. Марий Элын калык, Россий Федерацийын сулло артистше Нина Макаровам коллективын художественный вуйлатышыжлан палемдыме дене кызыт тудо сценыш у кӱкшыт дене лектеш. Мутат уке, репертуарыштым тӱҥ шотышто «Чодыра семынымак» коденыт. Но участник-влакым ужмеке, нунын йӱкыштым колмеке, ты ансамбляк шарналтеш. Адакше куштымашышт ден мурым йоҥгалтарымаштышт калык койышым арален коденыт. Гармоньчыштат, тӱмырзыштат, шӱвырзыштат шкеныштын. Ансамбльым угыч ылыжтымаште программым вӱдышӧ Сергей Карповынат надырже уло.

Куандара эше теве мо: тушко самырык тукым, И.Палантай лӱмеш Тӱвыра да сымыктыш колледжын, МарГУ-н студентышт-влакат кумылын ушненыт. Нунын кокла гыч иктыже – Шернур район Кугэҥер ял рвезе, колледжын «Российысе калык семӱзгар-влак» отделенийыште 3-шо курсышто тунемше Александр Коновалов. Шӱвыр семже тунар сылнын йоҥга, мӱкш гай ызга, эсогыл коваштет копыж-ж лиеш. Тудыжым М.Шкетан лӱмеш Марий кугыжаныш драме театрын актержо, Марий Элын калык артистше Сергей Данилов ыштен. А Саша тудым изиш шканже келыштарен.

Репетицийым эртарыме верышт – Ленин лӱмеш тӱвыра полат. Ансамбль умбакыже ила, вияҥеш, у шӱлышым налеш. Концерт программыште шӱвыр ден тӱмырлан посна верым ойырымыштлан кугу таум каласыман. Арам огыл ойлат, семӱзгарым телевизор гоч огыл, а залыште, семӱзгарым ужынак колыштман. Да тиде веле мо, сценыш лектын мурышымат, куштышымат шке шинча денак ужын гына артист койышыжым утларак шижат.

Тӱвыргӧ программым ончыктымыжлан да оласе тӱвыра илышым шке мастарлыкышт дене пойдарымыштлан Йошкар-Ола администраций, Ленин лӱмеш тӱвыра полат деч саламлымаш-влак йоҥгеныт. Тыгак ончычсо участник ден тӱвыра аланыште тыршыше-влак кӱкшын аклен тауштеныт.

С.Пехметова

Авторын фотожо

Опубликовать в Одноклассники

Добавить комментарий