«Шӱрымат шолтена, когыльымат кӱэштына»
Сурт коклаште пӧръеҥ деч посна пеш йӧсӧ, вет шке оралтыште, сурт коклаште эреак ала-мом тӧрлаташ, олмыкташ, шотыш кондаш кӱлеш.
– Чынжымак, ялыште илыше еҥ шуко сомылым ыштен мошта. Адакшым вес семынже огешат лий. Теве коҥгамат шкеак оптенам, кудывечыштат мо кӱлешым келыштараш тыршем. Мончам могай кӱлеш, тугайым чоҥенна, – каласкала Волжский район Нурмучаш Шайраште илыше Игорь Печников.
– Коҥга ялыште эн кӱлешан. Тудо пӧртымат ырыкта, коҥгашак шӱрым шолтена, когыльым, мелнам кӱэштына. Мемнан деке газ эше толын шуын огыл, сандене олташ пум эреак ямдылена. Тылеч посна вольыкымат, чывымат ашнена, пакча-саскамат ончен куштена, – ешара Людмила пелашыже.
Мужыр пелаш пашам, сурт кокласе сомылым пырля, икте-весым умылен, икте-весылан полшен ышташ тырша. Кок эргым йол ӱмбак шогалтеныт. Теве ынде изи уныка коча-ковам куандара.
Суртоза жапше годым Афганистаныште служитлен. «Тушто ме, совет салтак-шамыч, интернационал порыснам шуктенна. Армийлан Мемнам ончылгочак ямдыленыт: икмыняр килограмм нелытым нумалынна, куржталынна…
Тушто лийше моло пӧръеҥ семынак мыланемат верысе сылне пӱртӱс, мотор кугу курыкла ушеш лакемалт кодыныт. Чот шокшо игечылан кӧра эреак йӱшаш яндар вӱд эреак ситен огыл, тудым аныклаш тыршенна. Шарнем, лач тыгай курыкла гоч задачым шукташ кайымына годым мемнан ӱмбакына лӱйкалаш тӱҥальыч. Икмыняр йолташым йомдарышна. Кеч-куштат чытымаш, тыршымаш, пашам йӧратымаш кӱлыт. Икте-весым пагален, умылен илашат салтак илыш кугу шӱкалтышым ыштен», – шарналтен каласкала Игорь Печников.
Елена Эшкинина
Авторын фотожо
