«Сеҥымаш почто» проект Йошкар-Олаште кодшо ий гычак пашам ышта. Тудо Марий Эл вуйлатыше Юрий Зайцевын кӱштымыж почеш илышыш шыҥдаралтеш.
СВО-што участвоватлыше салтаклан серышым возаш кумылан-шамыч Йошкар-Оласе тӱвыра да каныме рӱдӧ паркыш кажне кугарнян, шуматкечын, рушарнян миен кертыт.
– Сӧй кайыме кундемыште кеч-могай салтак поро мутым колнеже, садланак шочмо мланде гыч тудын деке миен шушо серыш чонжым ырыкта. Мый гын боецна-влаклан серышым икмыняр гана возенам, – шонымашыжым каласыш рӱдолаштына илыше Ксения.
Паркыш пурымаште йоча-влаклан тыгак оҥай мастер-класс эртаралтеш. Нуно 3D-ручка дене трафарет полшымо дене тӱрлӧ талисманым «сӱретлат». Талисманым шкалан кодаш, тыгак волонтёрлан пуаш лиеш. Варажым тиде изирак пӧлекым СВО эртыме кундемыш салтаклан колтат.
А 16 августышто «Мемнан Геройна-влак» фотогалерей площадкыште Йошкар-Оласе социально кӱлешан проект-влакын координаторышт, МарГу-н ректоржо Михаил Швецов, Единый Россий партийын Самырык гвардийын регионысо пӧлкажын вуйлатышыже Артём Воронов СВО-што участвоватлыше боец-шамычлан серышым возеныт.
Каласыман, координатор-влак Йошкар-Олаште илыше-шамыч дене мутланат, калыкым тургыжландарыше йодышлан вашмутым пуат, йӧн лийме семын полшат. Санденак мер пашаеҥ ден вашлияш кумылда уло гын, рӱдоласе мероприятийыш чӱчкыдынрак коштса, соцкыллаште анонсым эскерыза.
«Сеҥымаш почто» проектын эртарыме пунктшо Йошкар-Оласе тӱвыра да каныме рӱдӧ паркыште кугарнян 17 шагат гыч 19 шагат марте, а шуматкечын, рушарнян 15 шагат гыч 19 шагат марте пашам ышта.
