Адакат у ий деч ончычсо тургым тӱҥале. Вашке пайремжат толын шуэш. Йомакысе гай тиде кечын чудым йоча-влак веле огыл вучат. Родо-тукымым, лишыл да эсогыл палыдыме еҥ-влакым тӱткыш, пӧлек дене ӧрыктараш лиеш. «ИНТЕЛЛЕКТУАЛ» тӱвыра да увер рӱдер» автономный коммерческий огыл организаций шкет илыше коча ден кова-шамычлан у ий пӧлекым погымо нерген увертара.
У ий пӧлекым 1 гыч 25 декабрь марте 18.30 гыч 20.00 шагат йотке шочмо, кушкыжмо да изарня еда тыгай адрес дене кондаш лиеш: Йошкар-Ола, Красноармейский урем, 41-ше пӧрт, 407-ше да 408-ше офис-влак. Тарваныме деч ончыч лучо 8-999-145-38-76 телефон дене йыҥгырташ.
Пӧлеклан носким, тапычкым, футболкым, шӱргӱштышым, личный гигиене сатум, чайым, шере кочкышым, лаштыклыме календарьым, саламлымашан открыткым кондаш лиеш.
Погымо пӧлек Марий Эл Республикыште верланыше илалше-влакын пӧртлашкышт кая. Ушештарена, регионыштына шкет илалше-влаклан палемдалтше тӱшка типан ныл да специальный индеш пӧрт уло. Тушто 1903 еҥ ила.
М.ИВАНОВА.
