Сентябрьыште «И КРАТКАЯ» кинофестиваль кокымшо гана эрташ тӱҥалеш.
Йодмашым 24 август марте, онлайн-анкетым возен, пуаш лиеш.Фестивальыш модмо, документальный, 40 минуташ анимационный фильм-влак ушнен кертыт. Тений «Очень краткое кино» номинаций ешаралтын. Тиде номинацийыште кинокартине вич минут деч шуко шуйнышаш огыл.
Конкурс программыш ойырен налме чыла кинолентын прокатный удостоверенийже лийшаш, палемденыт организатор-влак.
Йошкар-Олаште киносмотр 19-22 сентябрьыште эрташ тӱҥалеш. Организаторжо Регионысо кинематографийлан полшымо фонд, Россий кинематографист-влакын ушемышт, «ФИЛДОК» ден «ШАБЛИЙ» компаний-шамыч улыт. Кинофестиваль Марий Эл Правительстве ден республикысе Тӱвыра, савыктыш да калык-влакын пашашт шотышт министерстве полшымо дене эртаралтеш.
