КУЛЬТУР ДА ИСКУССТВО

СЕМЫКЛАН ТОШТЫЕҤЫМ УШТАТ, ЮМЫМ ПЕЛЕШТАТ

21 июньышто Морко районысо Изи Кушна ялыште регион-влак кокласе «Семык» пайрем эртен. Тудо районын 100 ияш лӱмгечыжлан да Еш идалыклан пӧлеклалтын.

Тушко Марий Элын чыла гаяк районжо да Татарстан республик гыч 14 усталык коллектив ушнен.

Семык – кугезына-влакын йӧратыме пайремышт. Тудо Кугече деч шым арня вара толеш. Семык годым тоштыеҥ-влакым уштат, Агавайрем Юмылан да Поро Ош Кугу Юмылан вуйым сават. Тоштыеҥ-влак деч илаш сай  йӧным ышташ йодыт. Агавайрем Юмо деч ӱден кодымо шурнылан аралтышым Поро Ош Кугу Юмо деч илышыште ласкалыкым, шулыкым, перкем да серлагышым йодын кумалыт. Тиде йӱлам Унчо села гыч онаеҥ Анатолий Яковлев ден Волжский район гыч Аркадий Фёдоров шуктышт. Нунын пелештымышт годым пайремыш погынышо чыла участник ӱстел йыр шогалын, юмылан пелештен.

Пайремым почмаште Морко муниципальный район администраций вуйлатышын алмаштышыже Алексей Васильев, Марий Эл Кугыжаныш Погын депутат Юрий Игнатьев, Семисола ял шотан илем администраций вуйлатыше Владимир Константинов лийыныт да кугезе пайрем йӱлам умбакыжат аралаш кӱлмӧ нерген ойленыт.

Варажым Алексей Геннадьевич тиде ялыштак илыше Людмила Михайловна ден Эврик Николаевич Ивановмытлан, мер да тӱвыра пашаште чолгалыкым ончыктымыштлан тауштен, пӧлекым кучыктен.

– Сценыште коллектив-влак тӱрлӧ пайрем дене кылдалтше йӱлам модын ончыктеныт. Ятырынже, мутат уке, Семык пайрем дене кылдалтшым ойырен налыныт: Изи Кушна тӱвыра пӧрт пеленысе «Кушна кундем» фольклор ансамбль «Ял мучаште Семык годым», У Торъял районысо Кузнеч тӱвыра пӧртын «Келшымаш» фольклор коллективше «Семык пайрем – тошто пайрем» муро да куштымаш дене келыштарыме композицийлам, Параньга район Яҥгетсола гыч «Ший шымаш» фольклор ансамбль «Семык изарня», Волжский районысо Корамас кундем гыч «Чоткар тукым» фольклор ансамбль пошкудышт деке унала коштмо йӱла-влакым модын ончыктеныт, – каласкала Морко рӱдӧ клуб системе вуйлатышын инноваций-методике паша шотышто алмаштышыже Любовь Кириллова. – Татарстан Республик Арск районысо Шорамучаш ял гыч «Шишор» фольклор ансамбльым калык шокшын вашлие. Татар калык коклаште илыше-влакат калыкнан муро ден куштымашыжым моткоч мастарын ончыктеныт.

Пайрем жапыште марий тӱрым тӱрлаш туныктымо мастер-классыш ушнаш, марий семӱзгар-влак нерген пален налаш да нунын дене шоктен ончаш йӧн пуалтын, марий калык модышат ятыр икшывым чумырен.

Пайремыш толшо кажне коллективлан диплом ден кубокым кучыктеныт.

Семык – тошто марий пайрем. Илыш вашталтме дене кугезе йӱлана мондалтынат кертеш, садлан тудым фестиваль семын Морко районышто тений кокымшо гана эртареныт.

 

Йоча годсо шарнымашем гыч: Семыклан пелйӱд деч вара кум еҥын пуым «шолыштын», мончаш олтенна, вӱдым кум памаш гыч налынна. Лӱмынак тӱрлӧ пушеҥге укшла гыч выньыкым пидынна да 77 тӱрлӧ шудо гыч вӱдым ямдыленна. Тыгайже дене чывылалтме шинча вочмым, осалым кораҥда да капкылым куштылемда маныныт.

 

А.БАЙКОВА

Фотом «Морко мланде-Моркинская земля»

группын лаштыкше гыч налме

 

 

 

 

Опубликовать в Одноклассники

Добавить комментарий