83 ий ончыч 22 июньышто, калыкнан тыныс илышыжым кӱрлын, мемнан эл ӱмбаке фашист Германий керылтын. 1996 ий гыч ты кечым Ойганен шарныме кече семын официально палемдена. Йошкар-Оласе рӱдӧ каныме паркыште эртыше кечылаште шарнымаш мероприятий-влак лийыныт.
Марий Эл вуйлатыше Юрий Зайцевын лӱмжӧ дене погынышо-влак ончылно Марий Эл правительстве председательын икымше алмаштышыже Михаил Васютин ойлен.
– Таче ачамландынан ик эн ойган кечыжым палемдена. 83 ий ончыч ик эн шучко сар тӱҥалын. Ты кечын тунам калыкна Марий автономийым ыштымылан 20 ий теммым пайремлен. Сар тӱҥалме нерген уверым колмеке, пайрем митингыш савырнен. Еҥ-влак доброволец семын элнам аралаш сарыш каяш возалташ тӱҥалыныт. Икымше кечынжак 1600 еҥ тидым ыштен. Мемнан кугыжанышын эрыкшым арален кодышо-влакым ме эре шарнаш тӱҥалына. 145 тӱжем утла еҥ Марий кундем гыч сарыш каен, пелыж деч шагалын гына мӧҥгеш пӧртылыныт, – каласен Михаил Зиновьевич.
Тудо тыгак ветеран-влак деке пагалымашым ончыктымылан, элнан историйжым шарнымылан тауштен да ончыкыжымат тыгаяк лийын кодаш тыланен.
«Мемнан ачана, кочана-влакын героический йӱлашт аралалт толыт. Таче фашизмын иделогийже адакат вуйжым нӧлтыштеш. Мемнан республик гыч эн тале эргына-влак границым аралымаште шогат. Ветеран организаций, ӱдырамаш, патриотический ушем-влак нунылан мо дене кертыт, полшаш тыршат. 80 ий ончыч фашизмым кырен шалатенна, кызытат тыгак ыштена. Элна, эрыкна, чапна верч вуйым пыштыше-влакым курымеш шарнаш тӱҥалына», – ешарен Михаил Васютин.
Шарнымаш мероприятийыш толшо-влак сарыште колышо-влакым ик минут шып шоген шарналтеныт да Воин чап монумент ден Курымашлык тул воктеке пеледыш аршашым пыштеныт. Йӱла почеш шарнымаш мероприятий Марково шӱгарлаштат эртен. Тушто 1941-1943 ийлаште элнан тӱрлӧ регионжо гыч колышо 800 еҥым тойымо.
Ошыгечынже Йошкар-Олаштат «Шарнымаш сорта» общероссийский акций эртен. Тушко мийыше-влак Кугу Отечественный сарыште колышо-влак лӱмеш кок тӱжем наре сортам чӱктеныт. Нине мероприятийлаште Йошкар-Олан мэржын пашажым жаплан шуктышо Антон Трудиноват лийын.
С.Носова
М.Скобелевын фотожо.
