Шукерте огыл Марий Эл Кугыжаныш архивыште документ-влакым чумырымо «Марийская АССР в документах Государственного комитета обороны СССР (1941–1945)» книга дене палдареныт.
Тудо Кугу Отечественный сарыште Сеҥымашлан 80 ий теммыллан пӧлеклалтын. Сборникым Кугыжаныш архивын да Йылмым, сылнымутым да историйым шымлыше В.М.Васильев лӱмеш институтын пашаеҥже-влак иквереш ямдыленыт. СССР Обороно министерствын кӱштымашыже ден пунчалже, тыгак Марий Эл Кугыжаныш архивын документше-влак негызеш тылыште лийше процесс-влакын значенийышт, СССР вуйлатыше-влак дене кылышт ончыкталтыныт, Кугу Отечественный сар кайыме ийлаште элнан аралалтме куатшым пеҥгыдемдымаште Марий АССР-ын надырже палемдалтын.
Чумырымо документлаште Марий АССР-ын примерешыже тыл, историй дене кылдалтше ятыр йодыш дене материалым ужын кертына, тиде – эвуакуаций, аралалтме объект-шамычым чоҥымаш, фронтлан полшымо, эвакогоспиталь, противоздушный ден противохимический аралалтмаш системе-влакын пашашт да шуко моло. Ятыр документше икымше гана савыкталтын.
Тиде книга мемнан элын да республикнан сар жапысе пагытышт нерген историй шинчымашнам келгемдаш полшышаш. Сандене тудо историк, краевед, архив пашаеҥ, туныктышо, студент, тыгак кундемнан историйжым сайынрак палаш тыршыше-шамычлан оҥай лийшаш.
Светлана Носова
Снимкыште: книган комжо.
Фотом Марий Эл Кугыжаныш архивын официал лаштыкше гыч налме.
