Марий Элым вуйлатышын пашажым жаплан шуктышо Ю.Зайцев Шернур сырзаводышто лийын. Палемдыме предприятий республикым 2020-2024 ийлаште социально-экономически вияҥдыме индивидуальный программе почеш субсидийым налеш.
Регионым вуйлатышын пашажым жаплан шуктышо шӧр гыч сырым ямдылыме, шуктымо, шинчалтыме, тыгак шӧр продукций ден йоча кочкышым фасоватлыме, сырым упаковатлыме, аралыме да пӱчкедыме отделенийлаште лийын, продукцийым тамлен ончен да коллектив дене мутланен.
Шернур сырзаводын директоржо Владимир Кожановын каласкалымыж почеш, производствылан шке окса деч посна субсидият сайын полша. Мутлан, оборудованийым лизингыш налыт, тидыже технологический процессым пайдалын уэмдаш йӧным ышта.
Завод районышто эн кугу налогым тӱлышӧ тӱҥ производственный предприятийлан шотлалтеш. Тыште 2022 ийыште тувыртышвӱдын нанофильтрацийже участкым уэмдаш, шӧрым приниматлыме отделенийым кумдаҥдаш, производительностьым 50 процентлан кугемдаш палемдыме. Ончыкыжым котельныйым уэмдат, пашашке «крем чиз» технологийым пуртат, сырым аралыме верым чоҥат, оборудованийын аппаратный участкыжым 30 процентлан кумдаҥдат да автоматизироватлыме у линийым колтат.
«Касвел эл-влакын санкцийышт продукцийым ужалыме у рынке-шамычым айлаш йӧным гына ыштат. Шернур сырзавод нерген шуко колынам. Чынжымак, чылажат пеш тамле. Предприятий шукерте огыл 50 ияш лӱмгечыжым палемден. Чыладамат пайрем дене саламлем да сеҥымашым, пиалым тыланем», – палемден Ю.Зайцев.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
