Марий Эл вуйлатышын пашажым жаплан шуктышо Юрий Зайцев республикысе чолга ӱдыр-рвезе-влак дене вашлиймаште молодёжьлан эше 5 грантым (кажныже 100 тӱжем теҥгеаш) пеҥгыдемдыме нерген увертарен.
Грант деч посна самырык-влаклан Кугыжаныш премийым кугемдаш темлен: чотшым – 10 олмеш 15, окса кугытшым – 20 тӱжем олмеш 40 тӱжем теҥге. Активист-влак кушкын толшо тукымым патриот шӱлышеш куштымо, кычалше отрядын пашаже, финн-угор йоча да молодёжь проект нерген каласкаленыт. Юрий Зайцев волонтёр-влакым посна ойырен палемден: «Волонтёр толкын пеш писын вияҥеш, илышысе чыла сферым авалта. Шӱм йодмо почеш еҥ-влаклан полшет гын, порыжо тыланет мӧҥгеш пӧртылеш», – манын тудо.
Юрий Зайцев «Воскресение» студент кычалше отрядын боецше Александра Бусыгиналан, «Паллада» парус клубын старший юнгаже Иван Немихинлан да Российысе «Волонтёр-медик-влак» толкынын регионысо пӧлкажым вуйлатыше Евгений Степановлан таумутан серышым кучыктен. Каласыман, Евгений 2021 ийыште Юл кундемысе федерал округын «iВолга» Молодёжь форумын грант конкурсыштыжо сеҥышыш лектын.
Марий Эл вуйлатышын пашажым жаплан шуктышо тыгак «Марий Элын боевой да паша чап рӱдерже» увер да ончер комплексым почмо шотышто йодышым рашемдаш кӱштен, уремысе фестивальым эртараш шонымашым сайлан шотлен.
Марий Эл Республикым вуйлатышын организаций да аналитике виктемжын уверже почеш Л.СЕМЕНОВА ямдылен
Д.РЕЧКИНЫН фотожо
