28 май – «Библиойÿд-2022» акцийым эртарыме кече.
Тений кумда Российыштына латикымше гана эртаралтше «Библиойÿд» акций калыкын тÿвыра поянлыкшылан пöлеклалтын. Тыгай шотан мероприятий Звенигово районысо Красногорский библиотекыштат лийын.
Мушмарий кундемыште эртаралтше «Библиойÿд» акций нерген возымо деч ончыч библиотекым вуйлатыше А.Семёновна дене изишак палдарынем. Провой кундемыште марий калыкын ончыкылыкшо верч шÿм-чон йÿлен пашам ыштыше еҥ шагал огыл, нунын кокла гыч иктыже – Алевтина Александровна. Тиде ÿдырамашын келге шинчымашыжым, мÿкшла лым лийде тыршымыжым, йырже изи йочамат, самырык тукымымат, илалше ийготан коча ден ковамат поген моштымыжым, тыматле койышыжо, мунло ойжо ден ласка йÿкшö дене эртарыме вашлиймашыже-влакым ужын, чон куана, да тыгайже шукынрак лийышт ыле манын шоналтет. А.Семёнова библиотеке паша, шочмо йылме, марий калыкын илышыже да тÿвыраж дене кылдалтше конкурслаште чолган участвоватла да кажныштыже гаяк сеҥыше-шамыч радамыш лектеш. Марий вуйлатыше, ончыл да чолга еҥ, артист, писатель, поэт, журналист, туныктышо, воспитатель, врач, ветеран-влак да шуко моло специалист дене пеҥгыде кылым куча да ышта, нунын дене кундемысе калыкым кумылын палдара. Тудын кажне мероприятийже оҥайын да ик шÿлыш дене эрта.
А.Семёнова тений «Библиойӱд» акцийым «Мушмарий сескем» краеведений клубын черетан заседанийжын кышкарыштыже усталык вашлиймаш семын эртарен. Тушко пагалыме поэтессе-влак Альбертина Иванова ден Надежда Эмыканым, «Марий Эл» газет редакцийын пашаеҥже-шамычым ÿжын.
Алевтина Александровна мероприятийым «Мушмарий кундем» презентаций дене почын. Тудын полшымыж дене палемдыме кундемыш пурышо чыла ял, нунын чапланыше еҥышт да сылне верлашт дене радамын палдарен. Вара «Мушмарий сескем» клубын чолга участникше-шамыч Геннадий Васильев ден Таисия Смирнова «Лÿҥгалтыш» мурым сылнын йоҥгалтареныт. Нунын весела кумылыштым верысе «Теремок» йочасадын (вуйлатышыже А.Семёнова гаяк марий шÿлышан Валентина Ивановна Васюкова) воспитанникше-шамыч авалтеныт: марий сем почеш лывыла койын куштеныт, почеламутым марла лудыныт. Мероприятийыш толшо калыклан Изи Каринан «Тый улат» мурыжо кугу пöлек лийын. Ӱдырын шÿм-чоным пыштен мурымыжым чылан гаяк шинчавÿд йöре колыштыныт. Красногорский посёлкысо 2-шо №-ан школын 4-ше классыштыже тунемше Аня Виногороват Йошкар-Ола гыч толшо уна А.Ивановалан сюрпризым ыштен – авторын «Шочмо йылме» почеламутшым сылнын лудын. 80 ийым эртыше Валентина Кириллова, самырык артист деч виян йÿкшö дене пöрт пырдыжым чытырыктен, «Аваем» мурым йоҥгалтарен.
Мутым пагален ÿжмö уна-шамычланат пуэныт. Поэтессе-влак А.Иванова ден Н.Эмыкан сылнымут аланыш толмо корнышт дене палдареныт. А тудыжо, мутат уке, йоча пагыт гыч тÿҥалтышым налын. Мо оҥайже, когыньыштымат шочмо йылме ден калыкым йöраташ ачашт кумылаҥденыт. Сылнымут мастар-шамыч тыгак книгашт дене палдареныт, а Альбертина Петровна эше икмыняр почеламутшым лудын.
– Районласе школлашке ма библиотекылашке але клублашке чÿчкыдын лектын коштына. Кажне ганажат пеленем марий книга-влакым ужалаш налаш тыршем. Теве тачат ярмиҥгашкыда ушнышым. Чаманен палемдем, кызыт калык киндым, шöрым, моло сатум налеш, но книга воктеч кораҥын ошкылеш. Тыге лийшаш огыл, – палемден поэтессе. – Ондак ме книга почеш куржталынна… Калык темлыме книга-влакым огеш нал гын, кеч ужшо, кидышкыже налын лаштыклен ончыжо манын шонем – таче огыл гын, ала эрла марий изданийым лудаш кумылжо лектеш.
Журналист-влак «Марий Эл» да «Сурт-пече» газет-шамыч дене палдареныт, нунын илыш дене тöр ошкылаш тыршымышт нерген ойленыт, шочмо йылме дене лекше изданийым лудаш кумылаҥден ÿжыныт.
Заседанийыште марий йылмын кызытсе положенийже да ончыкылыкшо нерген тургыжланен мутланеныт, тудым арален кодымо йöн-влакым лончыленыт да тыгайрак иктешлымашым ыштеныт: шочмо йылме аван шöржö да мурыжо, кован йомакше, туныктышын мастарлыкше дене вийым налын тÿзлана.
А Мушмарий кундемыште шочмо йылмын ончыкылыкшо уло. Тидыжым марий тувыран йоча-влак марий сем почеш марий койышым ончыктен куштымышт, марла возымо почеламутым тÿтыныде лудмышт, Изи Карина марий мурым йöратен мурымыж дене эше ик гана пеҥгыдемдышт. Нöргö чоныш пыштыме марий нöшмым кугурак-шамычлан вияҥден шогаш гына кÿлеш.
Теве тыгай шÿлыш дене эртыш Провой кундемысе Красногорский библиотекыште «Библиойÿд» акций. Тудын пайдалыкшым ужын, участник-влак вес ганат погынаш кутырен келшышт.
Маргарита ИВАНОВА
Авторын фотожо
