Марий Эл Российысе регионлаште молодёжь политикым комплексно вияҥдыме «Самырык-влаклан регион» федеральный программыште сеҥышыш лектын.
Тиде конкурсышто республикна кум ий почела сеҥыше-влак радамыште. 2023 ийыште кундемыштына молодёжь политикым вияҥдаш 122,4 миллион теҥге кугытан субсидийым пуэныт, 2024 ийыште – 95 миллионым. Ты гана программе дене келшышын 2025 ийлан Марий Эллан федерал бюджет гыч 97,7 миллион теҥге ойыралтеш. Тиде окса дене «Авангард» военно-патриотический рӱдерыште самырык-влакын моштымашыштым вияҥдаш площадке ден инфрастуктур объектлам ышташ, тыгак «10 граней патриотизма» общероссийский концепций кышкарыште мероприятийлам эртараш кучылташ палемдыме.
Таче Марий Эл правительствын паша направленийже гыч молодёжь политике ик эн кӱлешанлан шотлалтеш. Мемнан региог добровольчестве (волонтёрство) ден юнармий толкын-влакын вияҥмышт, самырык-влаклан паша верым муаш полышым пуымо, тыгак таза илыш-йӱлалан да спортлан кумылаҥдыме шотышто ончыл радамыште.
Ӱмаште икымше гана республикыштына самырык учёный ден нунын наставникыштлан Марий Элым вуйлатышын грантшым пуаш тӱҥалыныт.
Кундемыштына патриотизм толкын вияҥын толеш. Кызытлан 366 тыгай организаций уло, нуно чумыр налмаште 9,5 тӱжем еҥым авалтат. Юнармеец-влак шукышт элнан тӱрлӧ вузышкыжо тунемаш пурат, тидын шотышто мемнан регион Россий Федерацийысе ончыл лу субъект радамыш пура.
Кажне ийын Марий Элын молодёжьшо Россий кӱкшытан «Таврида», «Машук», «Территория смыслов» да моло форум ден фестивальлаште чолгалыкым ончыка да республикнан чапшым кӱшнӧ куча.
Марий Эл Республикым вуйлатышын пресс-службыжын уверже негызеш Г.Кожевникова ямдылен.
