УВЕР ЙОГЫН

Келшен пашам ыштет гын, сеҥымашат лиеш

Ӱмаште декабрьыште «Россий юрист-влакын ассоциацийышт» общероссийский мер организацийын марий региональный отделенийже 3 декабрьыште палемдалтше Юристын кечыже вашеш «Идалыкын юристше-2021» конкурсым эртарен. Тушто «Юрист – профессионал» номинацийыште Йошкар-Олан прокуроржын алмаштышыже Юрий Фадеев сеҥышыш лектын. А 12 январьыште Российыште прокуратур пашаеҥын кечыже палемдалтын. Эшежым РФ прокуратурлан тений 300 ий темын. Чыла тидым шотыш налын, шукерте огыл тудын дене мутым вашталтышна.

 

– Юрий Георгиевич, айста паша корныдам кӱчыкын рашемдена: Те кушеч улыда, мом тунем пытаренда, тымарте кушто тыршенда?

– Мый Кужэҥер район Кугу Лаждӱр ялыште шочын кушкынам. А кызыт ешем дене Йошкар-Олаште илем. Кугу Лаждӱр кандашияш школ деч вара 10-шо ден 11-ше класслаште Йӱледӱр кыдалаш школышто тунемынам. Тылеч вара Марий кугыжаныш университетын юридический факультетыштыже шинчымашым погенам. 2007 ийыште вузым пытарымеке, икмыняр тылзе Кужэҥер район  администрацийыште юристлан ыштенам. Тиде ийынак ноябрь гыч Медведево районысо прокуратурыш пашаш пуренам. 2009 ий гыч 2021 ий марте республикысе прокуратурышто тӱрлӧ должностьышто ыштенам. А ӱмаште апрель гыч Йошкар-Оласе прокуратурышто прокурорын алмаштышыже улам.

– Да ӱмаштак, 2021 ий декабрьыште, Тендам республикыште эн сай юрист-профессионаллан шотленыт! Тиде чот кугу кӱкшытан сеҥымаш. Ме Тендам уло кумылын саламлена. Земляк семынат мый Тендан дене кугешнем!

– Тау. Но тиде мыйын веле огыл сеҥымашем. Тиде – коллективын тыршымашыже. Тыгай кӱкшытыш шкетын шуаш, кугу пашам шкетын ышташ огеш лий. Коллектив, команде келшен пашам ышта гын веле лектыш лиеш.

– А конкурс кузе эртаралтын? Тушто мом ышташ кӱлын? Мом акленыт?

– Кажне юристын пашаже коеш. Сандене тидымак ончен акленыт. Тыгай конкурс кажне ийын эртаралтеш, но мыйын тушко ушнаш шонымашем але марте ик ганат лийын огыл. Шке пашамым кӱлеш семын шукташ тыршенам да чыла. Тиде амал денак ӱмаште тушко мыйым темлаш вуйлатыше-влак мутланен келшеныт манын, паленат омыл.

– А юристлан тунем лекмеке, Те прокуратурыштак пашам ышташ шоненда?

– Туге. Прокуратурыш пашаш пураш шонымашем лийын, молан манаш гын тиде паша оҥай. Мо дене оҥай? Тиде тугай структур, кушто эре иктаж-мом  гынат уым пален налат, иктаж-могай ойыртемалтше йодыш дене вашлиялтат, еҥ-шамычлан полшет, кугыжанышын интересшым аралет.

– Мыйын шонымаште, прокурор деч шукын лӱдыт…

– Прокурорын пашаже моткоч кумда да тӱрлӧ. Но ик эн тӱҥжӧ – тергымашым эртарымаш. Кӧ законым пудырта, тудо лӱдеш, очыни. А кӧн  нигушто нимогай титакшат уке, тудлан лӱдаш нимолан. Адакшым кӧн праважым пудыртеныт, шыгыремденыт, тыгай еҥ-влак мемнан деке полышым йодын толыт. Мутлан, пашадарым жапыштыже налын огытыл. Але илыме вер да коммунал озанлык, тыгай сомылым шуктышо виктарыше компаний-влак пашам ыштат, тиде услугылан тӱлымӧ дене кылдалтше да тыгай сынан моло йодыш   шотышто полшаш йодыт. Сандене тыгай еҥ-влакын праваштым ме арален налшаш улына. Тугеже нуно огыт лӱд, а, мӧҥгешла, мемнан дене вашлиймашым вучат. 

– Але марте пашам ыштымыда жапыште ушеш кодшо, чонеш поснак чот логалше иктаж дела але факт лийыныт?

– Чонеш логалше, ушеш кодшо факт-влак, мутат уке, лийыныт. Но ала-кудым иктым посна ойырен каласенат ом керт. Да тыге ойлашыже пеш чынжак огыл, шонем. Кушто тергымашым эртаренна, тушто законым пудыртымым ужынна да мемнан велым могай «акт реагирования» манмым ыштенна, тылеч вара законым пудыртымаш палдырнымым чарнен гын, тугеже тиде – шуктымо пашанан лектышыже. Но прокурор паша тугай – тудын шуктымо сомылжо  нигунамат чылаштлан огеш келше. Молан манаш гын иктын праважым арален налеш гын, тугеже титакан еҥжым мут кучаш шогалтыкта. Але, мутлан, еҥ-влаклан иктаж-мо шотышто ситыдымаш улмыла чучеш да вуйшиймаш дене толыт. Но тергымашым эртарымеке, ме рашемдена: тушто правам пудыртымаш лийын огыл. Сандене тыгай деч вара нине еҥ-влак мемнам вурсен, шылтален ойлен кертыт. Икманаш, прокурор чылаштлан йӧршӧ нигунамат ок лий.

– Пытартышлан вес сынан йодышым пуынем: яра жапыште Те мом ышташ йӧратеда? Ала, мутлан, ушым кандараш манын, колым кучаш кошташ але кидмастар семын иктаж сомылым шукташ келша?

– Яра жапыште, каныш кечылаште, ме ешна дене нылытынат телым ече дене кошташ, кеҥежым пӱртӱсыш лекташ йӧратена. Тыгак пелашемын ялышкыже але мыйын ачам-авам деке икшывына-влак дене пырля миен толаш тыршена. Кидмастар семынжак огыл гынат, ачам дене коктын тидым-тудым пырлят ыштена, вет ялыште сурт-оралте коклаште ыштышаш могай-гынат сомыл эре уло. 

Любовь Камалетдинова мутланен

Опубликовать в Одноклассники

Добавить комментарий