«Образований» национальный проектын «Кызытсе школ» национальный проектше почеш 2-13 сентябрьыште Марий Элысе общеобразовательный организацийлаште естественно-научный да технологий направлений дене чылаже 26 «Кушмо точко» рӱдер почылтеш. Тыге республикыштына чылаже 105 тыгай кумдык пашам ышташ тӱҥалеш.
Торжественный мероприятийлаште мастер-класс, почмо урок-шамыч эртаралтыт. Тушто рӱдерын у оборудованийже дене палдарат, практический занятий-влак лийыт.
Марий Эл Образований да науко министерствын увертарымыж почеш, 2023 ийыште регионысо общеобразовательный организаций-шамычлан жаплан келшыше оборудованийым налаш чумыр налмаште 57,5 миллион теҥге ойыралтын. Тышеч 25 миллион ула теҥгем рӱдер-влакын площадкылажым дизайн-проект дене келшышын ышташ кучылтмо.
Жаплан келшыше у тунемме кумдыкын тӱҥ шонымашыже – школышто физике, химий да биологий предметлам туныктымо йӧным уэмдымаш. Рӱдерыште у оборудований полшымо дене сай шинчымашым пуаш педагог-влак квалификацийыштым нӧлтымӧ курсым эртеныт.
Мутлан, Шернур районышто Шинчымаш кечын кум общеобразовательный организацийыште – Казанский, Зашижемье да Мустай школлаште – «Кушмо точкым» торжественно почыныт. Проект дене келшышын кажныштыже тунемме кабинетлам уэмден олмыктымо, у мебельым, тыгак физике, химий да биологий предметла дене кызытсе жаплан келшыше оборудованийым да роботехнике наборым вераҥдыме. Тыге тенийысе тунемме идалыкыште йоча-влаклан ешартыш программе-шамыч илышыш пурташ йӧным ыштыме. Нуныжо тыгай улыт: «Робототехнике», «Прикладной биохимий», «Самырык шымлызе», «Экспериментальный физике». Урок деч ӧрдыжсӧ программе-влак чумыр налмаште 199 икшывым авалтат.
Тыгаяк рӱдер-влак тиде кечылаште Медведевысе гимназийыште, Советский районысо Кельмаксола ден Солнечный, Марий Турек районысо Сысоево, Нартас школлаште почылтыныт.
Тиде кечылаштак Килемар районышто «Образований» национальный проектын «Кажне йочан сеҥымашыже» федеральный проектше почеш йоча-влаклан ешартыш образованийым налаш тӱрлӧ направлениян тунемме кумдык-шамыч почылтыныт. Мутлан, Церкысола кыдалаш школышто – туризм-краведений направлений дене, а Вӹзымйӓр школышто социально-гуманитарный дене «Школ медиацентр» пашам ышташ тӱҥалын, Килемар школышто художественный направлений дене «Школ театр» почылтын.
Г.Кожевникова
Фотом Марий Турек районысо образований пӧлкан сайтше гыч налме
