Молодёжный парламентын шымше заседанийыштыже ялысе самырык еҥ-шамычын яра жапышт да зацепинг нерген законым ямдылаш тӱҥалме нерген мутланеныт.
Яллаште да изи олалаште илыше самырык еҥ-влакын яра жапым лачшымак кузе эртараш шонымышт дене Молодёжный парламентын председательже Алексей Тришков палдарен.
Тылеч ончыч эртарыме онлайн-йодыштмашке Юл кундем федерал округын 13 регионжо гыч 2 тӱжем утла еҥ ушнен, тышеч 562 анкете Марий Эл гыч пурен. Шымлымаш самырык-влакын лачшымак кушто да кузе каналташ кумылан улмыштым, мероприятийлашке ушнаш шонымышт годым могай чарак дене вашлиялтмыштым да шуко молым рашемдаш полшен.
Респондент-шамыч каныме эн сай йӧн-влак кокла гыч кином, спорт секцийым, усталык мастерскойым, квестым да модышым палемденыт. Но шукышт эсогыл чонлан келшыше мероприятийлашке тунемаш шуко жапым ойырымлан кӧра ушнен огыт керт. Мутышт гыч, оҥай событий шагал, да нунын нерген увер ок сите.
Ялысе-влакым 18 гыч 22 шагат марте эртарыме тӱлыде ушнаш лийме але 300 теҥге марте акан очный але иквереш эртарыме форматан мероприятий-шамыч кумылаҥдат.
Самырык-шамычлан молодёжь ушем ден парламент, верысе администраций, тунемме заведений да мер организаций-влакын эртарыме мероприятийлашкышт кошташ келша. Шагал огыл еҥ нуным ямдылымашке да эртарымашке ушнаш ямде улмыжым палемден.
Тиде шымлымашым Марий Элын верысе шкевиктемже-влакын органлашкышт, тыгак исполнительный кучемжын органлашкыже да Кугыжаныш Погынышкыжо колташ пунчалме.
Вес йодыш Молодёжный парламентын «Марий Эл Республикыште административный правам пудыртымо нерген» законыш зацепинг ваштареш виктаралтше вашталтышым пуртымыж дене кылдалтын. Проектым ямдылыме паша дене молодёжный инфраструктурым вияҥдыме шотышто комитетын председательже Никита Крюков палдарен.
Заседанийыште комитетын председательжылан законопроектын текстшым ямдылаш, тудым Кугыжаныш Погын аппаратын правовой виктемыштыже пеҥгыдемдаш да Молодёжный парламентын черетан заседанийыштыже каҥашаш лукташ пунчалме.
Маргарита ИВАНОВА.
Марий Эл Кугыжаныш Погынын пресс-службыжын фотожо.
