У ийыште икымше кугарня могай числалан тура толмым ончаш изи годсек йӧратенна. Лач тиде кечын Шорыкйол арня тӱҥалеш да Васли кува, Васли кугыза лийын коштыт. Унчо кундемыште лач икымше кугарнян да арня гыч, Шорыкйол лектышлан, урем мучко мӧчӧр-шамыч коштыт.
Икмыняр ий ончыч ты пайремлан уремыште коштмо ушешем чотак лакемалт кодын. Мӧчӧр лийын чиен лекшашлык вургем нерген икмыняр кече ончычак шонаш тӱҥалынам. Кугарнян эрдене кокамын марий тӱран вынер тувыржымат, чӱчӱэмын салтак шинельжымат, ачамын тошто ужгажымат савырен чиен шогальым…
Кенета кудывечыште шӱшкалтыме йӱк шоктыш. Клат гыч куржын лектым. Ошалге вургеман айдемын ваштарешем ошкылмыжо трукышто лӱдыктышат. Кычкырал колтымем дене шке веле огыл, саде еҥетат тӧршталтен колтыш да тунамак, чурийжым почын, тидыже мый улам маншыла шыргыжале. Тудын ший пӱйжым ужын, кӧ огеш пален нал?! Клатыште вургемым кычалшыла да изи годсо книга ден тетрадь-шамычым ончен, жап эртымымат шижын омыл. Уремыште пычкемышалтмеке, Васли кува ден Васли кугыза лийын лекме нерген йолташ ӱдырем дене кутырен келшенна ыле.
Авамын ямдылыме пӱкшыжым тамлен ончымеке, уремыш лекна. Чонем изи йочала йывыртен, но тыгодымак капкылем мучко йӱштӧ вудым опталмылда чучын: ялын кӱшыл могырыштыжат, ӱлыл мучаштыжат у-у-у веле шокта. Лӱдмем йолташ ӱдыремлан шым палдаре. Шонымына семын кече лекме могырыш ошкылна. Икмыняр пӧрт гыч пошкудо деке пурен шуктышна ма уке, омсалондем тураште чурийыш маскым чийыше йоча-влакын куштымыштым ужна, а озавате нунылан тыгыде оксам, пӱкшым да кампеткым пуэден. Нунын лектын кайымекышт поро кумылан ӱдырамаш ӱстелтӧрыш мемнам ӱжӧ. Тамлын ӱпшалтше мелнажым, шыл кӧрган когыльыжым шоҥешталтше пураж дене тамлымеке, сугынь мутым ойлен, омса велке ошкылаш тӱҥалынна ыле. Но тыгодым озаватын уныкаже гармоньым луктын, сылне семже почеш мемнам кушталташ йодо, а шольыжо тыгодым омсам тӱкылен шындыш. Мом ышташ? Куш пураш? Ӱстелтӧрыштӧ шинчыме деч вара кӧн куштымыжо шуэш?! Мӱшкыр темын да огыл, моткоч пӱжалтынна, эсогыл тупрӱдӧ мучко вӱд йоген волен. Тыгодым салтак шинельым чийымемлан семынем шкемым ала-мыняр пачаш вурсен пытарышым. А мом ыштет, йочан йодмыжым шуктыде ок лий. Йолташ ӱдырем дене, мужыр дене шогалын, лу минут наре чарныде куштышна. Ковашт деке унала толшо оласе икшыве-шамычлан концертна пеш келшыш витне, изиракше телефонышкыжат войзен шинчыш. Тидын дене пайдаланен,..
!!! Материалым умбакыже 14 январьысе газетыште лудаш темлена !!!
А.БАЙКОВА
