Иван Петраев – сеҥыше
Шукерте огыл Ставропольышто «Российская школьная весна» фестиваль эртен.
Тушко элнан 79 регионжо гыч 12-18 ияш марте 1200 наре тунемше шке усталыкшым ончыктен. Шым номинацийыште нуным акленыт. Пошкырт кундем Калтаса район Амчемучаш ял гыч Иван Петраев «Калык семӱзгар-влак, соло» номинацийыште 1 степенян лауреат лӱмым сулен налын! Шукерте огыл тудо Марий Элыште эртыше «Изи гармоньчо» конкурсыштат Гран-при дене палемдалтын ыле.
Шошо каникул годым Иван Пошкырт велысак лӱмлӧ марий мурызо Полина Итальева дене Моско марий-влак деке миен коштын да нуным шке мастарлыкше дене куандараш полшен. Тушто рвезылан гитарым пӧлекленыт.
С.Носова
Снимкыште: И.Петраев П.Итальева дене пырля.
Фотом И.Петраевын еш альбомжо гыч налме.
