Кодшо шуматкечын Килемар округ Ардембал ял кумдыкысо «Поста сир» курыкышто «Кугезе мланде» этнографий пайрем 18-ше гана эртен.
Элнан кандаш регионжо – Марий Эл, Башкортостан, Татарстан, Чуваш республикла, Владимир, Киров, Нижегородский областьла, Донецк калык республик, Ямал Ненец автоном округ гыч – кок тӱжем утла уна ден участник лийыныт. Сандене пайрем кундемнан веле огыл, уло Российын кугу тӱвыра событийышкыже савырнен, манаш лиеш. Арда эҥерын мотор серже ты кечын гӱжлен. Мероприятийын тӱҥ шонымашыже – калык тӱвыра дене палдараш, акрет йӱлам аралаш, вияҥдаш да чыла тидлан самырык тукымым шӱмаҥдаш.
Поян пайрем программе кече мучко шуйнен. Ик эн тӱҥ событийже – композитор Эллина Архипован семжылан шындыме «Кӱдыратле Чумбылат» оперже. Икымше гана кава йымалне ончыктеныт. Эрик Сапаев лӱмеш кугыжаныш академический опер да балет театр «Марий Эл» кугыжаныш куштышо ансамбльын участникше-влакын полшымышт дене кугу проектым илышыш шыҥдарен. Чумбылатын тӱҥ партийжым Мариинский театрын солистше, тӱнямбал конкурс-влакын лауреатше Анатолий Михайлов мурен модын. Марий калыкын историйже, талешкыже дене кылдалтше кугу симфонический, вокально-хоровой да пластике постановко шукыштлан кужу жаплан шарнымаш кодеш, очыни. Вет тыгайым чӱчкыдын от уж.
Олык лапыште тӱрлӧ площадке пашам ыштен. Кидпаша мастар-влак шке ыштыш-кучыштым ончыктеныт, тӱлӧ мастер-классым эртареныт, эсогыл куаш туныктеныт.
Калык кочкышымат авызлаш йӧн лийын. Участник-влак тудым шке ыштен конденыт, кажныже гаяк поян ӱстелым чумырен.
Икшыве-шамычлан интерактивный программым эртареныт. Нуным тошто калык модыш денат модыктеныт. Сценыште усталык коллектив, мурызо-влак выступатленыт. «Марий книга издательстве» савыктыш пӧртын пашаеҥже-влак шке сатуштым ужаленыт.
Пайремыш мийыше-влакым регион вуйлатыше Юрий Зайцев лӱм дене правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов саламлен. «Тыгай фестиваль-влак калыкнан эртыме корныжо дене, илышыже, йӱлаже дене палдарат, самырык тукымлан чон кӧргӧ поянлыкым аклаш туныктат», – каласен тудо. Вара Килемар кундемым вияҥдымашке шке надырым пыштыше ойыртемалтше еҥ-влаклан тӱрлӧ кӱкшытан наградым кучыктен.
«Единый Россий» партийын еҥже-влакат мероприятийыш шукын ушненыт. Марий Эл Кугыжаныш Погын председательын алмаштышыже Александр Майоровын ойлымыж почеш, «Кугезе мланде» гай фестиваль «Еш» нацпроектын задачыже да партийын калык программыж дене келшен толеш. Пайрем тӱрлӧ национальностян да ийготан еҥ-влакым уша. А чыла тидыже калыкнам утларак икояным да вияным ышташ полша.
Марий Эл Кугыжаныш Погынын депутатше, «Единый Россий» партийын членже Антон Толстов:
– Кунам тыгай пайремлаш погынена, тоштым веле огыл шарналтена, ме тыге ончыкылыкыш кӱварым ыштена, икшывына-шамычлан шочмо мландым йӧратымынам, кугезына-влакын йӱлаштым пагалымынам ончыктена. Лач тыгай событий годым икоян улмына шижалтеш».
Светлана Носова
Марий Элын Тӱвыра, савыктыш да калык-влакын пашашт шотышто министерствыжын воткыл лаштыкше гыч налме фото.
