1 сентябрьыште Кугыжаныш Погынын председательже Михаил Васютин Курыкмарий районысо Виловат да Пӹзӹкныр школлаште лийын.
Районышто эн кугулан шотлалтше Виловат школышто таче 334 йоча тунемеш, 39 педагог пашам ышта. Тиде организаций инновационный образовательный программе-влак дене кылдалтше конкурслаште ик гана веле огыл сеҥышыш лектын, тыште тыгак «кызытсе школ» федеральный проектын полшымыж дене «Кушмо точко» рӱдерым почмо. Тений 11-ше классым тунем пытарыше индеш йоча гыч кудытынжо отличиян аттестатым налын. Школым лӱмын эртарыме сарзе операцийын участникше Андрей Замятин вуйлата.
1869 ийыште почылтшо Пӹзӹкныр школышто 148 икшыве тунемеш, 26 педагог да 3 воспитатель тырша. Школ директор Ольга Микрякова – Марий Эл образованийын сулло пашаеҥже. Тыштат тунемше-шамыч кӱкшӧ шинчымашым ончыктат.
«Правительстве, эл, президент кажне калыкын шке шочмо йылмыжым тунемын, йӱлажым шуктен да чыла тидым кушкын толшо тукымлан коден кертмыжлан кугу тӱткышым ойырат», – Шинчымаш кечылан пӧлеклалтше линейке-влакын элнан чыла лукыштыжо Россий калык-влакын икоян улмо шӱлыш дене эртымыштым палемден парламентын спикерже. Икымше классыш тунемаш толшо йоча-шамычым поснак шокшын саламлен, нунылан ончыкылык профессийым кызытак ойырен налаш, погымо шинчымашым кумдан кучылташ да шочмо кундемланат, элланат пайдале лияш тыланен. Виловат школышто 21 да Пӹзӹкнырыште 8 первоклассниклан пӧлекым кучыктен.
Михаил Васютин туныктышо-влаклан профессийлан ӱшанле улмыштлан тауштен да Россий президентын мутшым ушештарен: педагогын пашаже – обществылан служитлаш, элнан ончыкылыкшым кушташ. Депутат корпус Владимир Путинын педагог-шамычын посна статусышт да нунылан ешартыш полыш нерген указшым куанен вашлийын, тудым лишыл жапыштак илышыш пурташ ямде, палемден марий парламентын спикерже.
Торжественный линейке-влак деч вара Михаил Васютин Виловат школын капитально олмыкташ палемдыме зданийжым ончен савырнен, районым да образовательный организацийым вуйлатыше-шамыч дене пырля ончыкылык паша, верысе бюджет гыч финансирований, кумдыкым тӱзатыме нерген мутланен, тыгодым поснак кугу тӱткышым лӱдыкшыдымылыклан – школын саваржылан – ойырен.
Маргарита ИВАНОВА.
Марий Эл Кугыжаныш Погынын пресс-службыжын фотожо.
