Эртыше рушарнян медицине пашаеҥ-влак профессионал пайремыштым палемденыт.
Тудлан пӧлеклалтше торжественный мероприятий 11 июньышто Э.Сапаев лӱмеш опер да балет академический театрыште эртен. Медицине пашаеҥ-влакым Марий Элым вуйлатыше Юрий Зайцев саламлен, пашаште сай велым ойыртемалтше-шамычлан кугыжаныш наградылам кучыктен. А 15 июньышто воткыл лаштыклаштыже саламлыме мутым возымыж деч посна икмыняр медикым посна палемден.
– Таче поснак передовойышто сарзына-влаклан полшышо медицине пашаеҥ-шамычлан тауштымем шуэш. Нунын лӱддымылыкыштым, пеҥгыдылыкыштым, шкем чаманыде тыршымыштым, кӧргӧ куатыштым моткоч пагалем. Нунын кокла гыч иктыже – «Барс-5» добровольческий отрядын «Док» позывноян стрелок-санитарже Алексей Астафьев, – манын тудо.
Алексей Килемар районысо Механизатор-влакын посёлкыштышт шочын-кушкын, Чечня да Сирий кампанийлаште участвоватлен. СВО-шко икымше кечылаштак медик семын шке кумылын каен. Тушманын талын лӱйкалымашыже да нимучашдыме пуля йӱр йымач 300 наре сусыргышо сарзым нумал луктын, нунылан икымше медицине полышым пуэн да доктор-влак деке колташ полшен.
Стрелок-санитарын военнослужащийын экстремальный ситуацийлаште неле задаче-влакым шуктен кертмыжым пеҥгыдемдыше краповый беретше уло. Тылеч посна тудо – тактический медицине шотышто специалист. Алексей Херсон воктенысе Изюм кундемыште пашам ыштен. Подвигшылан Лука Крымский медаль дене палемденыт. Сарзынан шуко моло наградыжат уло. Кызыт Алексей Астафьевлан Российын Геройжо лӱмым пуаш темленыт. Боевой йолташыже-шамыч Алексейын патырлыкше нерген ӧрын да кугешнен ойлат, кеч шкеже подвигше нерген каласкалаш пешыже огеш йӧрате. Тудлан тиде – сарзын порысшо.
2022 ий мартыште Алексей Астафьев икмыняр гана сусырген да контузитлалтын. Пареммекыже, эре боевой действий кайыме кумдыкыш пӧртылын. Алексей медикын пашажым веле огыл шуктен. Пырля служитлыше-влакын каласкалымышт почеш, тудо, йолташыжым йомдарымылан чот ойганен, тушманын кумдыкышкыжо каен, тушто экипажым пытарен, танкым поген налын да шкенан-шамыч деке конден.
Кызыт Алексей шочмо Килемар районыштыжо ила. Идалык ончыч ӱдырым налын. Кызыт Елена пелашыж дене пырля ялозанлык пашам шуктат. Шыжым тӱҥалше фермерлан тунемаш да агробизнесыштым кумдаҥдаш шонат.
Юрий Зайцев тыгак врач-влакын династийыштым – Йошкар-Олаште илыше Мельникмытын ешыштым – профессионал пайрем дене саламлен да кажныжлан, нойымым шотыш налде, пациент-шамычын илышышт верч йӱдшӧ-кечыже кучедалмыштлан тауштен.
Максим Георгиевич Мельник – Марий Эл Тазалык аралтыш министерствын тӱҥ анестезиолог-реаниматологшо, Республикысе клинический больницын анестезиологий-реаниматологий отделенийжын вуйлатышыже.
Ачаже, Георгий Александрович Мельник, кугу стажан хирург, пагалыме специалист да сай наставник.
– Нунын профессионализмышт, пашалан ӱшанле да поро шӱм-чонан улмышт – мыланна чылаланнат пример, – палемден Марий Элым вуйлатыше.
Маргарита ИВАНОВА ямдылен.
Снимкыште: А.Афанасьев — шолаште.
Фотом Ю.Зайцевын воткылысе лаштыкше гыч налме.
