Федераций Советыште
Федераций Советын заседанийыштыже сенатор-влак парламентын кӱшыл палатыжын председательжылан Валентина Матвиенком, а икымше вице-спикерлан Владимир Якушевым сайленыт.
Тидын нерген Марий Эл вуйлатыше Юрий Зайцев шкенжын телеграмм-каналыштыже возен: «Элыштына илыш дене тӧр кайыше да сай лектыш дене пашам ыштыше парламент системе чоҥалтын. Сенатор-влакын сайлымашышт кугыжанышым пеҥгыдемдашке да граждан-влакын илышыштым саемдашке виктаралтын манын ӱшанем».
Кӱкшӧ кугыжаныш постышто Валентина Ивановна ден Владимир Владимирович ятыр ий тыршат, Российын позицийлажым тӱня мучко талештарымашке, социально-экономикыже вияҥмашке кугу надырым пыштеныт, палемден регион вуйлатыше. Саламлыме мут дене пырля Марий Эллан мелын улмыштлан тауштен.
Лидия СЕМЕНОВА
