УВЕР ЙОГЫН

Мо? Кушто? Кунам?

Скрипкым веле огыл шоктеныт

19 мартыште Национальный президент искусство школышто струнан да смычкан семӱзгарым шоктышо йоча ансамбль-влаклан конкурс эртен. Тушко республикысе 15 йоча искусство школ гыч 164 тунемше (30 дуэт, 18 ансамбль) ушнен.

Скрипкым шоктышо-влак коклаште  Йошкар-Ола гыч Д.Алимова ден В.Иванова (6-шо №-ан школ), А.Семенова ден Д.Шабалина (3-шо №-ан йоча искусство школ), Я.Никитин ден Я.Новикова («Лира»), И.Василенко ден М.Орзаева (Национальный президент искусство школ),  «Поющие смычки» ансамбль (6-шо №-ан школ) да Национальный президент искусство школысо скрипач-влак ансамбль икымше вер дене палемдалтыныт.

П.И.Чайковский лӱмеш йоча искусство школын тунемшыже-влак П.Жукова ден Д.Савицких, М.Вараксина ден А.Кашкова, Национальный президент искусство школ гыч П.Купсольцев ден К.Никитин да ты школынак ансамбльже  виолончельым шоктымышт дене ойыртемалтыныт.

 

Марлат, рушлат

17 мартыште Морко посёлкышто «Живая классика» конкурсын районысо этапше эртен. Йоча-влак руш да марий писатель-влакын произведенийыштым  рушлат, марлат лудыныт. Конкурсым аклыме годым участник-влакын артист койышыштым веле огыл, сылнымут произведенийым умылымо да образыш пурен моштымым шотыш налыныт.

Рушла лудмаште Л.Егорова (Моркысо 6-шо №-ан школ), Д.Оразаева (Унчо кыдалаш школ), О.Уразаева  (Моркысо 2-шо №-ан школ), а марла лудмо дене Д.Веденеева (Нуж-Ключ школ), Л.Насырова (Моркысо 1-ше №-ан школ) да Э.Николаева (Эҥерсола школ) сеҥыше-влак радамыш лектыныт.

 

Островскийым ончыктат

19 мартыште Оршанкысе Н.Лузгинов лӱмеш руш калык драме театр  А.Островскийын «Доходное место» пьесыж почеш шындыме спектакльым сценыш луктын. Тушто чылаже 12 артист модын. Тӱҥ рольым Антон Быбаков  (Василий Николаич Жадов)  чоҥен. Спектакльын режиссержо — Алевтина Падерова, костюмым Наталья Глушкова ямдылен.   

Опубликовать в Одноклассники