Ялысе кеҥеж модмаш – 2022
Сайынак кудалыштын, икымше лийын
26-31 июльышто Омск областьыште XIII Всероссийский ялысе кеҥеж спорт модмаш эртен. Тушто Марий Элын командыжат вийжым терген.
Шке тӱшкаштыже (250 тӱжем еҥ деч шагарлак илыман кундем коклаште), икымше верыш лектын.
Ты модмаште элнан чыла регионжо гыч ятыр спортсмен таҥасен.
Механизатор-влак коклаште регионна гыч Матвей Смирнов ончыко лектын. Матвей «вождение» дисциплиныште икымше верым налын. Такшым тиде видыште, троеборьеште, эн тӱҥжылан техникым виктарымаш шотлалтеш. Участник-шамыч фишкым тӱкыде да палемдыме нелытым мишеньыш чын шындышаш улыт улмаш. Тыгодым тушто кажне сантиметржым шотыш налыныт.
Спорт мероприятий «Спорт – илышын нормыжо» федерал проект дене келшышын эртен. Саламлена спортсменна-влакым.
Е.Эшкинина.
