Депутат-влак сайлыше-шамычын темлыме ойышт дене ыштышаш пашам радамленыт.
12 февральыште марий парламент ден Йошкар-Оласе депутат-влак погынын депутатышт «Сайлыше-шамычын Марий Эл Республик Кугыжаныш Погын депутат-влаклан наказышт нерген» законын кышкарыштыже ыштышаш паша нерген мутланеныт. Вашлиймаш Йошкар-Олан мэрийыштыже эртен.
Регионыштына 2024 ий 26 декабрь гыч вийыш пурышо тиде законышто калыкын депутат-шамыч дене вашлийме годым ыштыме темлымашлаж дене кылдалтше тӱҥ тат-влакым ончыктымо.
Вашлиймашым почмыж годым Йошкар-Ола округын вуйлатышыже, Депутат-влак погын председательын пашажым шуктышо Лев Покровский палемден: «Эртыше ийын сайлымаш деч вара Марий Элым вуйлатыше Юрий Зайцев депутат-шамыч ончылан республикыште илыше калыкын ӱшанжым сулаш, кажнылан пашам сайын ышташ, еҥ-влакым колышташ да колаш задачым шынден. Тудым илышыш пуртымо шот дене республикысе парламент Сайлыше-влакын темлыме ойышт нерген законым луктын. Кызыт Йошкар-Оласе депутат-влак погынат сайлыше-шамычын йодмашышт нерген пунчалын тыгаяк проектшым ямдыла».
Сайлыше-влакын темлыме ойышт нерген законын тӱҥ положенийже, йодмаш-шамычым чумырымо йыжыҥ, жап да ойырен налме йӧн дене коллегыже-шамычым Кугыжаныш Погынын председательже Михаил Васютин палдарен. Тыгодым тудым Йошкар-Олаште – регионын эн кугу агломерацийыштыже, республикын кугыжаныш, мер-политике да тӱвыра рӱдерыштыже – илышыш пуртымо ойыртем да деталь-влак нерген радамын каласкален.
«Сайлыше-влакын темлыме ойышт – тиде оласе ма ялысе калыкын йодмашыже-шамычым илышыш пуртымо ешартыш йӧн», – палемден Михаил Зиновьевич да тыште «Оласе йӧнан йырвел» ден верысе калыкын тӱҥалтышыжлан полшымо проект-влакын кумдан кучылталтмыштым ушештарен.
Сайлышын темлыме ойжо улшо але лекше йодышлам утларак еҥлан лончылаш йӧным ышта. Тудым илышыш пуртышашлан конкурс процедурым эрташ огеш кӱл. Кугыжаныш Погынын депутатше кӱлешанлан шотлымо да илышыш пурташ лийме йодмаш ден темлыме ой-шамычым калыкын погынымашлаж гыч пога. Сайлыше-шамычын йодмашышт нерген темлымаш ончылгоч шотлен лукмо роскот дене пырля погынымашын протоколжо семын ышталтеш. Михаил Васютин депутат ден муниципальный образованийын администрацийжым вуйлатыше-влаклан тидын шотышто поснак икымше йыжыҥыште пашам пырля ышташ кӱлмым палемден.
Тылеч вара депутат протокол-шамыч негызеш визыт деч шуко огыл объектым палемда да Кугыжаныш Погыныш 1 апрель марте конден пуа. Парламент чумырымо йодмаш-шамычым Марий Элын правительствышкыже 11 июнь марте колта, кучемын иктешлымыж почеш отрасль да кумдык шот дене шеледыме темлыме ой-шамычын пытартыш переченьыштым шушаш ийлан 1 ноябрь йотке пеҥгыдемда. Уполномоченный орган-влакым ыштат, нуно сайлыше-шамычын темлыме ойыштышт улшо йодышлам решатлат. Финансированийым кугыжаныш (муниципальный) программе-влакын мероприятийлаштым илышыш пуртымо кышкарыште республикын шушаш финанс идалыкшылан проектым ямдылыме годым пуртен кертыт. Моло случайыште оксам регионысо правительствын да верысе шкевиктем орган-влакын посна пунчалышт почеш ойырен сеҥат.
Йошкар-Ола мэрын пашажым жаплан шуктышо Антон Трудинов палемдыме законым ола кумдыкышто илышыш пурташ тӱҥалме нерген увертарен. Шонымыж почеш, кажне депутат рӱдолаште илыше калык дене вашлияш ямдылалтмыж годым шке округшын проблемный картыжым рашемдышаш, йодмаш-шамычым лончылымо да темлымаш-влакым чумырымо годым кудыжым эн ончыч шукташ кӱлмым, тудын дене мыняр еҥын пайдаланаш тӱҥалмыжым, роскотын кугытшым палышаш.
Депутат-шамыч Сайлыше-влакын темлыме ойышт нерген законын кӱлешлыкшым веле огыл палемденыт, тыгак тудым калыкын депутат ден кучемын чыла кӱкшытан органже-влаклан ӱшанжым кугемдаш полшышо кугу ошкыл семын акленыт.
Вашлиймаште законым илышыш пуртымо, депутат пашам шуктымо шотышто ятыр темлымашым ыштеныт. Мутлан, Кугыжаныш Погынын депутатше-шамыч Григорий Пейсахович ден Михаил Швецов ола администрацийлан муниципал служащий-шамычын депутатын йодмашыжлан радамынрак вашештымыштлан, Йошкар-Оласе виктарыше компаний-влакын депутат-шамыч дене пырля пашам ыштыме системыштым саемдымылан тӱткышым ойыраш йодыныт. Йодмаш ден темлыме ой але муниципал программе-влакын радамышкышт йочасад кумдыкым тӱзаташ, кудывечылаште йоча площадке-шамычым чоҥаш йӧным ышташ темлыше-влакат лийыныт.
Вашлиймашым мучашлыме деч ончыч Михаил Васютин чыла депутатлан мутланымашке ушнымылан тауштен да пырля тӱҥалме пашаште тӱвыргӧ лектышыш шуаш тыланен.
Маргарита ИВАНОВА
Марий Эл Кугыжаныш Погынын пресс-службыжын фотожо
