Тений Россий Федераций правительстве председательын алмаштышыже Татьяна Голикован кӱштымыж почеш, элнан кажне регионыштыжо «Демографий» национальный проектын кышкарыштыже пеш кугу мероприятий – «Работа России. Время возможностей» пашам муаш полшымо всероссийский ярмиҥга – эрта. Тудо элнасе пашам пуышо ден пашам кычалше-шамычым иквереш чумыра. Федеральный кӱкшытысӧ мероприятийын организаторжо – Россий Федерацийын Паша да социальный аралымаш министерствыже.
Пашам муаш полшымо всероссийский ярмиҥга кок йыжыҥан лиеш: икымшыжым регион кӱкшытыштӧ 14 да 15 апрельыште офлайн форматыште эртараш палемдыме, кокымшыжым – 23 июньышто федеральный кӱкшытыштӧ онлайн да офлайн форматыште .
Марий Элыште ярмиҥга чыла ола ден районышто эрта, но тӱҥ мероприятий 14 апрельыште 10 гыч 17 шагат марте регионын Мер-политике рӱдерыштыже (Гагарин проспект, 8-ше пӧрт) лиеш. Программыжым республикнан Паша да социальный аралымаш министерствыжын marieltrud.ru интерактивный порталыштыже рашемдаш лиеш. Тыштак мероприятийыште участвоватлыше пашам пуышо-влак дене палыме лияш йӧн уло. Пашам пуышо-шамычын вакансийыштым trudvsem.ru. порталыште вераҥдыме.
Республикысе пашам муаш полшымо службын специалистше-шамыч пашам пуышо-влак дене пырля регионын 70 утла кугу предприятийыштыже тӱрлӧ вакансийым темлат.
Тыгак кызыт кушко тунемаш пураш шонышо-влаклан Почмо омса кече лиеш. Тушто таче кечылан да ончыкылыклан кӱлешан профессийлан тунемме йӧн нерген каласкалат.
Калыклам пашам муаш полшымо службын специалистше-влак ярмиҥгаш толшо-шамычын профессийлан лачшымак кушто тунемаш, кугыжаныш деч могай полышым налаш лийме йодышыштланат вашештат.
Ярмиҥгаште пашадыме граждан-шамыч ден тунемме заведенийлан выпускникышт веле огыл, кӱкшӧ квалификациян специалист ден пашазе, профессиональный паша аланым вашталташ але келшыше пашам вес регионышто муаш шонышо-влакат участвоватлен кертыт.
М.ИВАНОВА
Фотом интернет гыч налме
